Kosova po përballet me kërcënime nga jashtë, veçanërisht nga Serbia, tha të shtunën kryeministri Albin Kurti.
Në ditën e dytë të Forumit të Paqes në Paris, ai tha se ideja për shkëmbim territoresh nuk ka vdekur, por se nuk ka mundësi që të zbatohet.
“Ashtu si Moska është e pakënaqur me rënien e Bashkimit Sovjetik, Beogradi nuk është i kënaqur me rënien e Jugosllavisë, të cilën e ka shkaktuar vetë. Jetojmë në kohë kur ky projekt i shkëmbimit të territoreve ka dështuar, por ideja nuk ka vdekur dhe këtë e shoh shpesh kur takoj apo dëgjoj presidentin e Serbisë [Aleksandar Vuçiç] duke folur publikisht ose gjatë një takimi në Bruksel”, tha Kurti.
“Njerëzit që kanë ëndërruar ndërrimin e kufijve prej disa vitesh e kanë të vështirë të heqin qafe nostalgjinë dhe inatin dhe të marrin pjesë në një zgjidhje demokratike dhe evropiane. Pavarësisht dështimit të projektit të [shkëmbimit të territorit], ideja ekziston, por pa mundësinë e zbatimit të saj. Sa më shpejt të normalizojmë marrëdhëniet me njohjen de jure dhe de facto [të Kosovës dhe Serbisë], aq më mirë do të jetë për të gjithë”, tha Kurti.
Kryeministri i Kosovës tha se asnjë nga shtetet fqinje të Serbisë nuk do të jetë i sigurt nga kjo derisa të hyjë në Bashkimin Evropian.
“Në njërën anë duan të shohin ndarjen e Kosovës, do të donin kompensim territorial për gabimet e tyre, por kjo nuk është e mundur. Nga ana tjetër, ne jemi dëshmitarë të përpjekjeve destabilizuese në Bosnjë, Mal të Zi dhe Kosovë, fqinjët e Serbisë, ndonjëherë edhe në Maqedoninë e Veriut. Fqinjët e Serbisë, përderisa nuk janë pjesë e BE-së, nuk janë të sigurt nga Serbia dhe për këtë duhet të kujdeset Brukseli”, arsyetoi ai.
Kurti tha se Federatës Ruse i pëlqejnë përpjekjet për destabilizimin e Ballkanit Perëndimor, të cilat, sipas tij, ndikojnë në largimin e vëmendjes nga agresioni që Moska filloi 20 muaj më parë në Ukrainë. /tesheshi.com/
