Nga Blendi Gashi
Serbia ka vazhduar forcimin e strukturave të saj paralele në Kosovë, duke emëruar zyrtarë në krye të institucioneve ilegale.
Zyra serbe për Kosovën e cila udhëhiqet nga Marko Gjuriq, ditë më parë ka njoftuar se Zoran Stojkoviqin është emëruar në krye të zyrës për rajonin e Anamoravës në Kosovë, me seli në Kllokot. Stojkoviq do të bëjë koordinimin e funksionimit të institucioneve të Republikës së Serbisë në rajonin e Anamoravës.
Zyra e Anamoravës parashihet të jetë përgjegjëse për Gjilanin, Novobërdën, Vitinë dhe Kamenicën. Zyra të tilla të strukturave paralele ka edhe në Mitrovicën Veriore, në Graçanicë dhe në Kralevë.
Këto ndërhyrje të Serbisë në territorin e Kosovës bëhen edhe përkundër se shuarja e strukturës paramilitare “Mbrojtja Civile” dhe integrimi i tyre në institucionet civile të shtetit të Kosovës, ka qenë një prej temave në takimet që janë zhvilluar në Bruksel ndërmjet zyrtarëve të Republikës së Kosovës dhe asaj të Serbisë.
Edhe pas disa takimeve në Bruksel mes palëve, çdo gjë ka mbetur vetëm në kuadër të fjalëve dhe Beogradi asnjëherë nuk ka shprehur gatishmëri t’i largojë këto struktura.
Përkundër moszbatimit të marrëveshjes nga Serbia, qeveria e Kosovës zotohet se do të vazhdojë bisedimet me shtetin fqinj, siç thotë, për normalizim të marrëdhënieve.
Ekspertët e çështjeve të sigurisë thonë se heshtja e qeverisë ‘Mustafa-Thaçi’, dëmton mundësinë që Kosova të funksionalizohet. Ata thonë se për veprimin e strukturave ilegale serbe duhet të mblidhet urgjentisht Këshilli i Sigurisë së Kosovës.
Eksperti i çështjeve të sigurisë, Burim Ramadani, ka deklaruar në një pronocim për portalin tesheshi.com se ekzistimi dhe riforcimi i strukturave paralele të Serbisë brenda shtetit të Kosovës paraqet një sfidë të veçantë të sigurisë në Kosovë.
Ramadani thotë se jo vetëm në aspektin diplomatik, por edhe në aspektin institucional, Serbia po vazhdon të ndërhyjë brenda Kosovës, duke pamundësuar ndërtimin e një shteti të qëndrueshëm të Kosovës.
“Si shtet i brishtë, Kosova nuk mund të funksionalizojë elementet përmbajtjesore të saj, prandaj vazhdimi i strukturave paralele serbe duhet të klasifikohet si kërcënim për sigurinë kombëtare.
Duhet që Këshilli i Sigurisë së Kosovës të mblidhet urgjentisht vetëm për këtë çështje dhe të miratojë një pako masash institucionale për të intervenuar institucionalisht në përballje me këtë kërcënim të sigurisë kombëtare të Kosovës.
Mosveprimi institucional, më shumë se heshtja institucionale, dëmton mundësitë që Kosova të funksionalizohet”, thotë Ramadani.
Eksperti tjetër i sigurisë, Hajrullah Tërnava, thotë se Qeverisë së Kosovës i ka humb rruga në oborr, andaj nuk është befasi pse Serbia emëron
Kordinator për Anamoravën. Sipas tij një gjë e tillë ka ndodhur si reakcion ndaj aktgjykimit të Gjykatës Kushtetuese për çështjen e Asociacionit.
Tërnava thotë në një prononcim për tesheshi.com veprimet e ndërmarra së fundmi nga Serbia i sheh si një kërcënim permanent që në të ardhmen mund ta destabilizojë situatën në Kosovë.
“Serbia do të insistojë në të ardhmen edhe më shumë ta acaroj situatën me veprime dhe metoda të luftës speciale ta destabilizojë Kosovën. Tani, qeveria jonë duhet të jetë më e vendosur dhe pikërisht kur Serbia ndërmerr dhe i përforcon strukturat paralele në Kosovë, duhet t’i anulojë të gjitha bisedimet me Serbinë derisa të eliminohen të gjitha srukturat paralele dhe për këtë veprim në të ardhmen të kërkoj garanca edhe prej shteteve ndërmjetësuese të BE-së”, ka deklaruar Tërnava.
Ndryshe, në raportin e paraqitur në muajin nëntor pranë Bashkimit Evropian nga qeveria e Kosovës thuhej se Serbia po i mbështet strukturat paralele, në vend se t`i shpërbëjë në përputhje me marrëveshjen e Brukselit.
Në raport, ndër të tjera thuhej se vetëm pas konfirmimit të largimit të strukturave paralele të Serbisë në Kosovë do të fillon themelimi i Asociacionit të komunave me shumicë serbe. /tesheshi.com/
