Kryeministri i Turqisë, dhe njëkohësisht kreu i partisë AK, Ahmet Davutoglu, ka deklaruar përpara përkrahësve të partisë së tij pas publikimit të rezultateve që ende nuk është vendosur se çfarë do të bëhet për qeverinë e re që pritet ta drejtojë sërish ai.
“Vendimi i kombit është më i miri. Mos u bëni merak, ne nuk i përulemi asnjë pushteti tjetër përveç popullit”, ka thënë Davutoglu pas mbledhjes së kryesisë drejtuese të Partisë për Zhvillim (AK). Kryeministri ka falenderuar elektoratin e tij.
Një aleat i mundshëm i AK, partia nacionaliste MHP ka arritur një rezultat të mirë, por Oktay Vural, kreu i së djathtës ekstreme, ka deklaruar se “është ende herët për të folur për koalicione. Këtë duhet ta vendosë AK”. Burime diplomatike perëndimore bëjnë të ditur se Erdogan preferon një aleancë me partinë kurde HDP në mënyrë që të zgjidhe përfundimisht këtë proces paqeje të nisur nga Presidenti.
Sipas të dhënave zyrtare që janë publikuar nga televizioni publik TRT, nga 99% të votave të numëruara janë këto rezultate: Partia për Drejtësi dhe Zhvillim (AK): 40.95 %. ose 259 deputetë nga 550 që ka gjithsej parlamenti turk. Mazhoranca absolute është 275 deputetë. Partia Republikane e Popullit (CHP) ka marrë 25,15% me 132 deputetë, Partia e Lëvizjes Nacionaliste (MHP) ka marrë: 16,44% ose 82 deputetë. Ndërsa surpriza ka qenë partia kurde Partia Demokracia e Popujve (HDP): 12,78% e cila ka arritur të futet në Parlament dhe ka marrë 78 deputetë.
