Kryeministri Rama u ka përcjellë një ftesë shqiptarëve të Maqedonisë Veriore që të regjistrohen si të tillë në Censusin që po zhvillohet në këtë vend.
Sipas tij, kjo është në vazhdën e asaj që u arrit në Platformën e Tiranës, inisiator i së cilës ishte pikërisht ai.
“Platforma e Tiranës është një faqe e ndritur e luftës së gjatë për liritë dhe të drejtat e shqiptarëve në Maqedoninë e Veriut.
Politika e ditës, ashtu si kudo po ju ndan dhe juve, por s’duhet t’ju pengojë të shihni identitetin tuaj, si kauzë e mbi të gjitha kauzat, sot është momenti kur asnjë prej jush, asnjë i vetëm, nuk duhet të mungojë në regjistrimin e ri të shtetit të Maqedonisë të Veriut.
Ky regjistrim bëhet pas shumë vitesh nga ata që nuk donin numërim, e që nuk lanë dy gurë bashkë për ta lënduar kauzën e identitetit shqiptar në atë shtet.
Ju e dini më mirë se kushdo, se nga numri i shqiptarëve të regjistruar varet fuqia kushtetuese në atë shtet dhe në vendimmarrje.
Nuk ju kërkohet të merrni pushkën dhe te dilni në mal, por të harxhoni vetëm 5 minuta që të shkruani në këtë adresë, të mbroni gjuhën që jua dha baba.
Miq, ne shqiptarët kemi një problem të madh që nuk vlerësojmë peshën e madhe e një zinxhir gjërash të vogla, mendojmë për fitoret e mëdha, por humbim ato të voglat, prandaj ka ndodhur jo rrallë që jemi zgjuar me vonesë dhe kemi pësuar kosto të madhe.
Nesër kostoja do jetë shumë e madhe, prandaj uluni dhe kryejeni këtë, duke u regjistruar me krenari si shqiptar në Maqedoninë e Veriut”, shkruan i pari i qeverisë shqiptare. /tesheshi.com/
