Krisen marrëdhëniet “vëllazorëre” ndërmjet Serbisë dhe Greqisë pas vizitës së parë të një shefi diplomacie të Athinës në Kosovë.
Beogradi zyrtar është irrituar shumë dhe nuk ka duruar pa i shfryrë “dufin” diplomatik vendit me të cilin ka marrëdhënie më të ngushta në Ballkan.
Ministri i Jashtëm serb, Iviça Daciç, ka thirrur ambasadorin e Greqisë në Beograd, Constantine Economides dhe i ka dorëzuar një shkresë të shkruar me dorën e tij, drejtuar homologut Nicos Kotzias.
Siç bën të ditur MPJ e Serbisë, përmbajtja e kësaj letre ka qenë e ashpër që e ka cilësuar “kalim i caqeve” deklarimin për njohjen e pavarësisë së Kosovës.
Daçiç, edhe publikisht ka thënë për mediat se Serbia i ka dërguar një kërkesë Ministrisë Jashtme të Greqisë, ku i janë kërkuar shpjegime rreth qëndrimit që ka shprehur diplomati grek Nicos Kotzias gjatë qëndrimit në Kosovë, se vendi i tij do ta ndihmojë Kosovën për anëtarësim në organizata ndërkombëtare.
Daçiç shprehet se është i vetëdijshëm se Greqia po përballet me presion të madh për të njohur Kosovën, por shpreson që kjo nuk do të ndodhë.
Gjatë vizitës në Kosovë dy ditë më parë ministri i Jashtëm i Greqisë, Nicos Kotzias në takimin që pati me kryeministrin e Kosovës, Isa Mustafa, theksoi përkrahjen e Greqisë për proceset e anëtarësimit të Kosovës në organizatat ndërkombëtare, përfshirë ato të sigurisë, duke shprehur bindjen se këto procese do t’i shërbejnë stabilitetit në rajon. /tesheshi.com/
