Këshilli për stabilizim dhe asocim i BE-së kërkon nga Maqedonia që urgjentisht të zbatojë reformat të cilat janë pjesë e marrëveshjes politike të nënshkruar ditë më parë nga liderët e katër partive më të mëdha politike me fokus të veçantë në fushën e sundimit të së drejtës në të cilën kërkohet angazhim i të gjitha palëve.
Në deklaratë, thuhet se nga pala maqedonase këshillin e ka kryesuar Nikola Popovski, Ministër i Punëve të Jashtme të Republikës së Maqedonisë, ndërsa nga ana e Bashkimi Evropian bashkëkryesues ka qenë Miroslav Lajçak i cili ka përfaqësuar zyrtaren e lartë të BE-së, Federica Mogherini, ndërsa pjesë e diskutimit ka qenë edhe komisionari i BE për zgjerim Johannes Hahn, dhe zëvendëskryeministri i Maqedonisë Fatmir Besimi.
Në konkluzionet e Këshillit të miratuar në Bruksel theksohet edhe thirrja e Komisionit Evropian për një hetim të plotë dhe të pavarur lidhur me të gjitha akuzat të cilat kanë dalë nga afera e përgjimeve duke respektuar parimin e pavarësisë së gjyqësorit dhe prokurorisë: “Këtë vit nuk do të ketë pushim për institucionet e Maqedonisë, të cilat duhet shpejt të përfundojnë përgatitjet për realizimin e Marrëveshjes së 2 qershorit.
Më 15 shtator duhet të ketë Prokuror special siç u dakorduam”, ka deklaruar komisari Johaness Hahn, pas takimit me diplomatët e Maqedonisë.
Sa i përket zhvillimit ekonomik të Maqedonisë, Këshilli thekson se ekonomia e vendit ka tendenca të rritjes për çka ka inkurajuar qeverinë të vazhdojë me menaxhimin e financave publike.
Përgatiti: Bekim Laçi tesheshi.com
