Nga Mensur Krasniqi
Protesta e së enjtes e zyrtarëve të lartë të Bashkimit Demokratit për Integrim dhe e simpatizantëve të saj kundër vendosjes së kryqit gjigant në komunën e Butelit, vendbanim ky edhe i një pjese të madhe të komunitetit shqiptar dhe mysliman, si ngjarje kryesore e ditës është përcjellur nga të gjitha mediat në Maqedoni. Të revoltuar nga partneri i koalicionit të tyre në qeveri, VMRO-së, që pa respektuar parimin e Badenterit(pakicës), në nivel lokal kanë sjellë vendim për ta “kryqëzuar” Butelin e Shkupit, përfaqësuesit e BDI-së në pamundësi për të parandaluar vendosjen e simbolit fetar institucionalisht, protestuan në rrugë kundër saj. Në këtë protestë morrën pjesë me qindra simpatizantë të BDI-së, me ç’rast nën rekomandimin e partisë së tyre kanë thyer gurthemelet e kryqit dhe vendosën çadrat, ku sipas tyre do të qëndrojnë atje derisa të anulohet vendimi i komunës së Butelit për kryqin. Në vazhdim portali tesheshi.com ka bërë një përmbledhje të titujve dhe komenteve të mediave maqedonase rreth këtyre protestave.
Duke filluar nga titujt më të butë të portaleve objektive që pasqyruan gjendjen reale të protestës si “plusinfo” ku shkruan kështu: “Protestuesit dogjën palmën dhe vendosën tendat” dhe “Kampi BDI-së mbetet në Butel, derisa të bie kryqi”, e deri te ato titujt famoz të portaleve proqeveritare maqedonase ku shpeshherë komentojnë shtrembër ngjarjet kur shqiptarët protestojnë, duke i dhënë kahje(kuptime) të ndryshme.
Ja edhe disa tituj tendencioze të gazetave dhe portaleve të këtij soji.
Gazeta maqedonase Veçer shkruan kështu:
“Në marrëveshje me Spasovskin është tërhequr policia dhe janë vendosur tendat në Butel”.
Kjo gazetë proqeveritare ka akuzuar ministrin teknik të Punëve të Brendshme, Oliver Spasovskin si përkrahës kryesor të zyrtarëve të lartë të BDI-së, që, pa u penguar fare nga policia, në sy të tyre kanë thyer gurthemelet e kryqit dhe kanë shkatërruar rrethojat duke vendosur tenda në shenjë proteste. Në vazhdim kjo gazetë ka shkruar se për Spasovskin, më me rëndësi janë interesat partiake se sa shteti dhe populli maqedonas.
Portali Kurir që i gjithë opinioni është i njoftuar se financohet drejtpërdrejt nga VMRO-DPMNE, ka shkruar kështu:
“Rebelim dhe kaos i shqiptarëve duke ndjekur shembullin e Zaevit”
Ky portal pretendon se BDI, në stilin e Zoran Zaevit, po proteston kundër vendosjes së kryqit në komunën e Butelit. Më parë, kryetari i LSDM-së opozitare kishte protestuar dy muaj të plota nën tenda para qeverisë duke kërkuar dorëheqjen e kryeministrit Nikolla Gruevski. Pra kjo mënyrë e protestës është një formë për të mbledhur poena politike me proçedura destruktive tashmë të lexuara nga opinioni.
Një portal tjetër, Republika ka vendosur këtë titull mbi protestat e djeshme:
“Kaos në Butel: Protestuesit i thyen themelet e kryqit dhe vendosën çadra me flamuj të Shqipërisë”.
Pra, sipas portalit Republika, edhe përkundër paralajmërimeve të zyrtarëve të BDI-së se protestat do të kalojnë në atmosferë të qetë dhe demokratike, kjo protestë u shndërrua në protestë të dhunshme dhe provokative. Republika habiten se si policia nuk ka reaguar ndaj vandalistëve që thyen themelet e kryqit e më pas në vendin ku duhej të vendoset kryqi, vendosën shqiponjën”.
Ndërsa në Libertas, poashtu portal maqedonas shkruhet kështu:
“BDI fjeti nën kryqin e VMRO-DPMNE-së”
Ndërsa për televizionin nacional Sitel, po të mos i jepte leje ministri Spasovski, asnjë protestues po edhe zyrtar i BDI-së nuk do kishte mundur të depërton nën rrethojat e gurthemelit të kryqit.
Titulli i tv Sitel: “Spasovski mbron dhe nxit kaosin dhe prishjen e rendit”
Më e rëndësishme në gjithë këto komente, dhe pozivite padyshim, është se, edhe maqedonasit i janë qasur politikisht çështjes në fjalë, pa e ngatërruar fenë në të. Askund në komentet e tyre nuk janë përmendur “myslimanët”, ngase kjo nuk është aspak një çështje fetare, e aq më pak çështje myslimanësh, pasi kryqi, sot e gjithë ditën trajtohet si politik. /tesheshi.com/
