Tatuazhet janë një mënyrë për të shprehur veten apo për të mbajtur gjallë kujtimin e dikujt të dashur. Por vizatimet me bojë nën lëkurë kanë edhe risqet e tyre kur është fjala për shëndetin.
Dr. Marie Leger, dermatologe në Universitetin e New York-ut, Langone Medical Center, ka studiuar efektet negative të tatuazheve. Ajo bën një listë të shkurtër të gjërave që duhen pasur parasysh para se të merret vendimi për të bërë një tatuazh.
Infeksionet
Një tatuazh i bërë jashtë kritereve higjienike mund të çojë në infeksion. Infeksionet mund të vijnë nga elementë të ndryshëm të procesit, që nga personi që e bën tatuazhin e deri te boja. Nëse tatuazhi juaj skuqet, enjtet apo ju dhemb, duhet të drejtoheni menjëherë te mjeku.
Alergjitë
Mund të zhvillohen alergji nga tatuazhet. Pacientët që nuk kanë pasur reagim alergjik nga tatuazhet e para mund të hasin këtë problem nëse bëjnë tatuazhin e dytë ose të tretë.
Alergjitë e tatuazheve mund të jenë të vështira për t’u trajtuar.
Fshehja e problemeve të tjera
Mbulimi i lëkurës me tatuazhe mund të fshehë probleme të tjera të shëndetit, duke e bërë të vështirë identifikimin e tyre në fazat fillestare. Ka pasur raste kur tatuazhet kanë mbuluar simptoma të melanomës.
Ekspozimi në diell
Tatuazhet mund të rrisin rrezikun e djegies nga dielli. Një studim danez në 2014 nxori se 42 për qind e të pyeturve në plazh kishin pasur probleme me tatuazhet. Të paktën gjysma e tyre kishin simptoma si enjtje, kruarje dhe skuqje.
Probleme me rezonancën magnetike
Njerëzit që duhet t’i nënshtrohen një rezonance magnetike mund të kenë probleme me tatuazhet. Në vitin 2011, një futbollist profesionist pati djegie gjatë rezonancës magnetike. Rasti shkaktoi habi dhe mjekët menjëherë nisën kërkimet për të zbuluar shkaqet. Arsyeja ishin rrymat elektrike që formoheshin në hekurin që ndodhej në përbërje të bojës së tatuazhit. Mjekët thanë se pacientët me tatuazhe të zeza duhej të bënin kujdes, pasi kjo bojë përmban oksid hekuri./tesheshi.com/
