E famshmja aktore e Hollywood-it, e përkushtuar në ndihmën e dhënë refugjatëve, Angelina Jolie, ka në plan të vizitojë refugjatët sirianë që gjenden në Mardin, në provincën juglindore të Turqisë.
Fituesja e çmimit Oscar në kinematografi i pati vizituar fillimisht në vitin 2011 të shpërngulurit sirianë në Turqi, në kohën kur konflikti sapo kishte nisur. Asokohe në Turqi gjendeshin vetëm 10.000 refugjatë sirianë, e nuk mendohej se kjo shifër do të shkonte në rreth dy milionë, aq sa ç’është sot.
Angelina Jolie do të shoqërohet në vizitën e saj nga Antonio Guterres, komisioneri i lartë i OKB-së për refugjatët. Ky i fundit ka qenë këto ditë në Stamboll për të paraqitur një raport mbi gjendjen e refugjatëve në botë, e ku bëhet e ditur se Turqia është vendi që ka pritur numrin më të madh të refugjatëve. Aktualisht në vend janë mbi dy milionë refugjatë, por ky numër pritet të rritet pas intensifikimit të luftimeve mes forcave kurde dhe luftëtarëve të ISIS-it.
Kampi që pritet të vizitojë aktorja amerikane ka më tepër se 5.000 refugjatë. Sipas shifrave më të fundit të autoriteteve turke, në 25 kampet e refugjatëve janë strehuar 259.523 sirianë, ndërsa vetëm në dy javët e fundit dyndja solli dhe 20.000 të shpërngulur të tjerë, të cilët u ikën luftimeve të ashpra në qytetin e Tel Abjadit.
Jolie, nënë e shumë fëmijëve të adoptuar, mësohet se ka në plan të adoptojë dhe një djalë sirian. /tesheshi.com/
