Zbulimi në Turqi: ja ç’mbanin romakët

Gjatë gërmimeve në vendin antik të Hadrianopolis, në rajonin verior të Detit të Zi të Turqisë, arkeologët zbuluan një maskë hekuri 1800-vjeçare, që tregon ekzistencën e Perandorisë Romake në rajon.

E vendosur tre kilometra në lindje të qytetit të Karabuk, në provincën me të njëjtin emër, vendndodhja quhet edhe “Zeugma e Detit të Zi” për shkak të ngjashmërisë së saj me mozaikët e Zeugma në provincën juglindore turke të Gaziantep.

Gjatë punimeve në qytetin antik, deri më tani janë gërmuar të paktën 14 objekte, si dy banja, dy objekte kishash, një godinë mbrojtëse, varre prej guri, një teatër dhe një mur qyteti.

Kafshët si kuajt, elefantët, panterat dhe krijesa mitike, janë paraqitur në mozaikë, të cilët i kanë sjellë qytetit një reputacion.

Gërmimet zbuluan gjithashtu skelete në varre guri, monedha të lashta, kapëse flokësh prej kocke, një unguentarium (shishe loti) dhe një varr që daton në shekullin e dytë pas Krishtit, si dhe një pllakë kushtimi 1800-vjeçare.

Ersin Celikbas, kreu i ekipit, tha se gjatë gërmimeve të këtij viti kanë gjetur të dhëna të rëndësishme që tregojnë ekzistencën e Perandorisë Romake në rajon.

“Siç e shihni, gjatë gërmimit u zbulua një maskë hekuri. Kur e kontrolluam, konstatuam se i përkiste kalorësisë romake”, shtoi ai.

Ai theksoi se mund të flitet për ekzistencën e një garnizoni romak dhe një bazë ushtarake në Hadrianopolis.

“Kjo do të thotë se Roma planifikoi të mbrohej duke ndërtuar baza kundër të gjitha llojeve të rreziqeve që mund të vinin nga rajoni i Detit të Zi në territorin e saj. Ne mendojmë se një nga këto qytete ushtarake mbrojtëse ishte Hadrianopolis,” tha Celikbas. /tesheshi.com/