Për vitin shkollor 2017-2018, shpërndarja e teksteve për nxënësit e shkollave 9-vjeçare do të nisë në 25 gusht dhe do të përfundojë në 10 shtator.
Ndërsa, për arsimin parauniversitar, shpërndarja do të nisë në datën 11 Shtator.
Kjo përcaktohet në urdhërin e firmosur nga ish-ministrja e Arsimit, Lindita Nikolla, që duket se ka mbetur në fuqi, pasi ministrja teknike në detyrë, nuk ka nxjerrë asnjë udhëzim tjetër.
Ashtu si çdo vit, librat do të mund të tërhiqen në librari ose në pika të tjera shitjeje pranë shkollave, nga subjektet e licencuara.
Sipas urdhrit, me kërkesën e botuesve apo distributorëve, drejtoritë e shkollave janë të detyruara të vënë në dispozicion falas një ose dy ambiente për shitjen e teksteve shkollore, për periudhën e mësipërme kohore.
Po ashtu, dokumenti i firmosur nga Nikolla, saktëson se punonjësve arsimorë u ndalohet shpërndarja e teksteve, me përjashtim të teksteve për nxënësit e pakicave kombëtare, që për këtë kategori mund të bëhet vetëm nga punonjës arsimorë të ngarkuar nga Drejtoritë Arsimore Rajonale dhe drejtoritë e shkollave përkatëse. /tesheshi.com/
