Një vendim shumë i rëndësishëm është marrë nga Gjykata e Apelit të Palermos, e cila ka dënuar qeverinë italiane se ka tentuar të bëjë marrëveshje me Cosa Nostra-n e Palermos, pikërisht pas atentateve ndaj Giovani Falcone-s dhe Paolo Borselino-s.
Vendimi konsiderohet “historik”, pasi ka vulosur në një akt ligjor atë që përflitej deri tani: lidhjen e fortë mes shtetit italian dhe mafias siçiliane.
Gjykatësi i Palermos, përveç dënimit të pjesëtarëve të klanit mafioz të Corleones që drejtohej nga Toto Riina, ka dënuar gjeneralin e ROS(Repartit të Operacioneve Speciale të Karabinierëve), Mario Mori, ish-senatorin e Forza Italia-s dhe krahun e djathtë të Silvio Berlusconi-t, Marcelo del Utri dhe disa drejtues të karabinierëve si dhe drejtues lokalë, sipërmarrës dhe pjesëtarë të Cosa Nostra-s.
Sipas vendimit, Cosa Nostra ka pasur dy tentativa dhe negociata me shtetin italian.
I pari ka qenë pas bombave në Capaci dhe Via D’Amelio, pra vrasjes së Falcone-s dhe Borselino-s, në vitin 1992, si dhe pas bombave në Romë e Firence në vitin 1994.
Pas akteve terroriste të egra kundër prokurorëve dhe gjykatësve më të rëndësishëm të Siçilisë, Toto Riina nisi negociatorë në qeverinë e atëhershme italiane, ku me anë të një peticioni, i ashtuquajturi “Papello” kërkoi zbutjen e ligjit antimafia që i mbyll në burgje të izoluar krerët e krimit të organizuar, ndryshimin e vendimit të të famshmit Maksiproces, (ku Falcone mblodhi të gjithë krerët e Cosa Nostra-s në një sallë dhe i gjykoi së bashku, ku u dënuan të gjithë me burgim të përjetshëm), si dhe ndryshimin e ligjit për të penduarit.
Ajo negociatë çoi në rrëzimin e qeverisë së Giuliano Amato-s dhe ardhjen në krye të qeverisë të Guvernatorit të Bankës së Italisë, Carlo Azeglio Ciampi, i cili nuk lejoi asnjë kompromis dhe marrëveshje me Cosa Nostra-n.
Ciampi, i cili më tej vazhdoi si ministër në qeverinë e parë të Romano Prodit e më pas President, ishte kryeministri që urdhëroi dërgimin në Palermo të një grupi të fshehtë karabinierësh që aritën të arrestojnë Totot Riina-n.
Sipas vendimit të sotëm, tentativa e dytë e negociatave të Mafias me Shtetin ishte në vitin 1994 kur në qeveri kishte ardhur Silvio Berlusconi dhe krahu i djathtë i tij ishte Marcelo Dell’Utri, njeriu i Cosa Nostra-s në financën e lartë të Milanos.
Në krye të Cosa Nostra-s ishte këtë herë Bernardo Provenzano, i cili tentoi të zbusë ligjin për burgun e ashpër.
Në këtë kohë, revista e Londrës Economist publikon një pamflet që e cilëson si letër të hapur të Provenzanos drejtuar Berlusconi-t.
Aleati i Forza Italia-s, Lamberto Dini largohet nga koalicioni me Berlusconin dhe Silvio rrëzohet si kryeministër duke kaluar në opozitë. Deri në vitin 1996 italia u qeveris nga një qeveri teknike e mbështetur nga e majta. /tesheshi.com/
