UNICEF: Fenomeni El Nino vë në rrezik jetën e miliona fëmijëve në Afrikë

Agjencia e OKB-së për fëmijët, UNICEF-i, bëri të ditur dje përmes një deklarate se, për shkak të fenomenit meteorologjik El Nino, rreth 11 milionë fëmijë në lindje dhe në jug të Afrikës po përballen me urinë, sëmundjet, e me mungesën e ujit.

Vendi më i prekur është Etiopia, që po vuan thatësirën më të madhe në 30 vite. Më shumë se 8 milionë etiopianë kanë nevojë për ndihma ushqimore, dhe ky numër mund të arrijë në 15 milionë në vitin e ardhshëm, lajmëroi agjencia e Kombeve të Bashkuara.

Somalia është po ashtu një vend ku ka nisur të ndjehen efektet e fenomenit El Nino. Atje priten përmbytje të mëdha, teksa 3 milionë njerëz kanë nevojë për ndihma.

Përmbytjet, rrëshqitjet e tokës dhe sëmundjet mund të ndikojnë në jetën e 2.5 milionë fëmijëve në Kenia.

Thatësira ka prekur në jug të kontinentit afrikan dhe Zimbabvenë, Malavinë e Afrikën e Jugut.

Gjysma e fëmijëve në Malavi janë të kequshqyer, e UNICEF druhet se situata mund të përkeqësohet.

Thatësirat dhe përmbytjet e mëdha po sjellin kequshqyerje dhe po e rrisin pambrojtshmërinë e fëmijëve ndaj sëmundjeve vdekjeprurëse.

Fenomeni El Nino shkaktohet nga ngrohja e Paqësorit, dhe parashikohet të bëhet më i fuqishëm në fillim të vitit të ardhshëm, duke u dhënë shkas tajfuneve dhe cikloneve. /tesheshi.com/