Kanë nisur të dalin orë pas orë detaje nga takimi ndërmjet Kryeministrit Edi Rama dhe kreut të Kuvendit, Ilir Meta, në zyrën e këtij të fundit në suazën e konsultimit para seancës së ditës së nesërme.
Siç mësohet, dy kanë qenë pikat kyçe të këtij takimi: kërkesa e Kryeministrit për të mos munguar deputetët e LSI-së në seancën e nesërme dhe hapja e lojës së “aleancave fluide”. Mësohet se të dy palët kanë shkëmbyer akuza se po bëjnë negociata jashtë koalicionit: Meta ka akuzuar se Rama po tenton të miratojë reformën në drejtësi me Bashën, ku në prapaskenë po angazhohen faktorë të rëndësishëm ndërkombëtare, dhe Rama ia ka kthyer se nuk duhet të aktivizosh aleancat fluide me Berishën.
Intervista e mbrëmshme e Spartak Brahos, mësohet se ka qenë pikërisht detonatori i tensionit në takimin e sotëm, i cili sipas të gjitha gjasave nuk ka vendosur paqen. Kryeministri ka thënë se nëse nuk miratohen nesër dy ligjet që kërkojnë 84 vota, atëherë qeveria do t’i tërheqë ato nga Kuvendi.
Në fakt pas këtij takimi, kryesia e Kuvendit ka vendosur në rendin e ditës dy kodet e rëndësishme.
- Për votim:
– Projektligji “Për disa shtesa dhe ndryshime në ligjin nr. 8738, datë 12.2.2001 “Kodi
Rrugor i Republikës së Shqipërisë”, të ndryshuar”” (neni 83, Kushtetutë – votim me 3/5 e të gjithë anëtarëve të Kuvendit)
– Projektligji “Për një shtesë në ligjin nr. 152/2013 “Për nëpunësin civil” të ndryshuar”
(nenet 81, 83, Kushtetutë – votim me 3/5 e të gjithë anëtarëve të Kuvendit).
Media të ndryshme në vend i kanë fryrë një lojë të fortë të Ilir Metës, i cili sipas tyre e ka kapur Ramën në befasi dhe po e sulmon fuqishëm duke e vënë në qosh të ringut, duke i kërkuar largimin e ministrave të padëshiruar siç janë: Saimir Tahiri dhe Damian Gjiknuri.
Por një intervistë e mjeshtrit të nëntokës politike, Dritan Priftit ka ndryshuar rrjedhën e ngjarjeve.
Prifti tha tek emisioni i gazetarit Çim Peka, se për Metën kanë ardhur dy dosje nga vendet partnere që ndodhen në Ministrinë e Brendshme. Sipas Priftit: “Nëse ata dosje bëhen publike Ilir Meta nuk është një minut i lirë…”
/tesheshi.com/
