Shpërthimi i mbrëmshëm në Ankara qe i fundit i një serie të tillë sulmesh terroriste që kanë goditur Turqinë në muajt e fundit. Bilanci është tragjik: 28 të vdekur e 61 të plagosur!
Makina-bombë shpërtheu mbrëmë ndërsa në bulevardin Inëny (İnönü) po kalonin automjete të shërbimit ushtarak, duke lënë të vdekur e të plagosur ushtarakë e civilë. E konfirmoi këtë zëvendëskryeministri turk, Numan Kurtulmush, në një dalje para gazetarëve në orët e vona të së mërkurës.
Kurtulmush deklaroi se një grup prej shtatë prokurorësh po punonin për zbardhjen e ngjarjes, duke i dënuar njëkohësisht aktin terrorist, kryerësit e shpërthimit e forcat që gjenden pas këtij sulmi, si edhe ata që u kanë dhënë mbështetje financiare, logjistike e informative terroristëve.
Ndërkohë është mësuar dhe emri i terroristit që hodhi në erë makinën dhe veten e tij. Ai është siriani Salih Nexhar, dhe mendohet të ketë hyrë në Turqi me masën e madhe të refugjatëve. Akoma nuk ka të dhëna se për llogari të kujt organizate e ka kryer ai sulmin. Makina e përdorur për sulmin terrorist bëhet e ditur të jetë marrë me qira dy javë më parë në Izmir, për t’u pajisur më pas me targa të rreme, të Stambollit. Përgjegjësinë për sulmin nuk e ka marrë asnjë organizatë deri më tani.
Nuk ka vonuar dhe reagimi i presidentit turk, Rexhep Tajjip Erdogan, që në një deklaratë nënvizon mes të tjerash, “Ne kemi për ta vazhduar luftën tonë me më shumë vendosmëri kundër këtyre pengjeve dhe forcave pas tyre që i kryen këto sulme të cilat nuk kanë asnjë kufi moral apo njerëzor.” Erdogani anuloi me këtë rast dhe vizitën e planifikuar për sot në Azerbajxhan.
Ankaraja do të tronditej muaj më parë, në tetorin e vitit të shkuar, nga një tjetër akt terrorist. Shpërthimet asokohe pranë stacionit qendror të trenave në kryeqytetin turk u morën jetën 97 personave e plagosën 246 të tjerë mes një morie njerëzish të mbledhur për një manifestim paqësor. /tesheshi.com/
