Te Mercedes sqarojnë: as që bëhet fjalë për sabotim të Hamilton-it

Lewis Hamilton po kalon periudhën e tij më të vështirë te Mercedes-i. Kampion bote në Formula 1 në dy sezonet e fundit, britaniku nuk e ka provuar ende shijen e fitores në këtë sezon. Era është kthyer t’i fryjë për mbarë shokut të tij të skuadrës, e njëkohësisht rivalit numër një për momentin, Nico Rosberg-ut.

Problemet në makinë kanë bërë që Hamilton të mos shfaqë tërë potencialin e tij. Dhe britaniku nuk e ka fshehur pakënaqësinë ditën e djeshme, kur pa Rosberg-un të fitonte sërish. Hamilton deklaroi se nëse makina do të kishte qenë në rregull, ai do ta kishte fituar garën.

Fillimisht, ai e nisi garën i dhjeti në Soçi të Rusisë, një pozicion vetëm për shkak të problemeve të makinës. Për të vijuar me një vetëpërmbajtje në xhirot e fundit të garës, po prej problemeve të njëvendëshes së tij.

Mercedes-i është detyruar t’u kthejë përgjigjeve zërave që thonë se mund të ketë një veprim të qëllimshëm në makinën e britanikut, me synimin për të shpallur kampion një pilot gjerman. Sipas Mercedes-it, nuk ka sabotim të makinës së Hamilton-it.

Ka qenë vetë drejtori ekzekutiv i Mercedes-it, Toto Wolff, që i ka hedhur poshtë pretendimet për sabotim të makinës së tre herë kampionit të botës, duke thënë se ato vijnë nga njerëz të çmendur.

“Gjëja e fundit që do të bënim është të sabotonim Hamilton-in,” ka deklaruar Wolff. “Ai është një mik i madh për ne… Ky është një sport mekanik, dhe këto gjëra ndodhin.”

Rosberg është përballur gjithashtu në dy vitet e shkuara me situata të ngjashme. Ndërsa makina e Hamilton-it ishte e papërmbajtshme, shpesh gjermani qe detyruar të tërhiqej nga garat për defekte të ndryshme. /tesheshi.com/