Nga Miradie Hasani
Pak orë pas vendimit të Gjykatës Supreme në Shkup ku u vendos për lirimin e katër prej 6 të dënuarve të rastit “Monstra”, gëzimi në familjet e tyre ka qenë i papërshkrueshëm. Tek burgu i Idrizovës, familjarët e Haki Azirit dhe Agim Ismajloviçit i pritën nëpër shi të dashurit e tyre.
Emocione të papara, mungojnë fjalët me të cilat ata do të përshkruanin ndjenjat e tyre, ku nga dënimi me burg te përjetshëm, tashmë janë në liri, ndërkohë që kanë bërë 5 vjet pas hekurave.
E vetmja gjë që dëgjohej ishte: “E vërteta vonon por nuk harron”.
Haki Aziri, pas daljes nga burgu tha se vendimtare për të, në kurajo e durim, ka qenë bindja se është plotësisht i pafajshëm.
“Bindja në Zot dhe bindja se jemi të pafajshëm dhe se një ditë do të dalë e vërteta edhe mbështetja e familjarëve dhe mbështetja e gjithë popullit shqiptar, na ka bërë që të tejkalojmë edhe atë sfidë. Shpresoj se do të dalë e vërteta, shpresoj se ka dëshmi që do ta tregojnë pafajësinë tonë, ne jemi të bindur në vete se jemi të pafajshëm”, tha Haki Aziri.
Edhe i liruari Agim Ismailoviç tha se drejtësia vërtet vonon, porse një ditë e vërteta del në shesh. Ai shpreson se vetëm një gjyqësor i pavarur do të dëshmojë pafajësinë e tyre.
“Çdo fillimi është i rëndë, por deshi Zoti që drejtësia edhe pse vonon, në fund ajo del. Por del në shesh e vërteta dhe shpresoj që fundin t’ia lemë gjykatës që të vendos drejtësi. Presim që pafajësinë tonë ta dëshmoje vetë gjyqësori, gjyqësor i pavarur. E ndiej vetën se jam i pafajshëm dhe se betohem se jam i pafajshëm nuk kam lidhje me këtë rast. Nëse është gjyqësori i pavarur do të dëshmohet pafajësia jonë”, tha Agim Ismailoviç.
Nga pala mbrojtëse thonë që në rifillimin e procesit në Gjykatën Themelore, do të kërkojnë që të prezantohen provat me të cilat i kanë dënuar.
Avokati Rauf Osmani tha: “Presim që plotësisht të zbardhet ky rast, pasi jemi optimistë që edhe fajtorët e vërtetë këtij rasti do të zbulohen. Jam i bindur se në këtë ngjarje janë të përfshirë edhe shërbimet sekrete. Është rast i montuar klasik, janë njerëz të pafajshëm”, tha avokati mbrojtës.
Dy të dënuarit e tjerë në mungesë, Afrim Ismajloviç dhe Halil Demiri gjenden të lirë në Kosovë, pasi nuk u realizua ekstradimi nga autoritetet e drejtësisë kosovare, siç thuhet për mungesë provash.
Rasti “Monstra” më 24 nëntor u kthye në rigjykim nga Gjykata Supreme, për shkak të dyshimeve në lidhje me dëshmitë për vrasjen e pesëfishtë të ndodhur afër liqenit të Smilkovcës më 12 prill të vitit 2012. /tesheshi.com/
