Rusia kundërshtoi sulmet ajrore në Siri mbi pozicionet e grupit militant Shteti Islamik, pas një takimi që kryediplomati rus, Sergei Lavrov pati me homologun amerikan, John Kerry dhe atë saudit, Adel al-Jubeir në Doha.
Në një konferencë të përbashkët shtypi me ministrin e Jashtëm të Katarit, Khalid bin Mohammad al-Attiyah, Lavrov theksoi se Uashingtoni nuk ka kërkuar asnjëherë lejen e Qeverisë siriane, e kjo përbën sipas tij, një shkelje të ligjit ndërkombëtar dhe sovranitetit të Sirisë.
Lavrov i tha Kerrit se Rusia është kundër edhe vendosjes së forcave trajnuese në Siri, por shtoi se sulmet ajrore nuk janë të mjaftueshme për të mposhtur Shtetin Islamik, e bëri thirrje që trupat qeveritare siriane të përdoren si mbështetje nga toka në këtë betejë.
Sipas Lavrov, presidenti rus, Vladimir Putin ka propozuar krijimin e një fronti të vetëm që synon unifikimin e përpjekjeve për të luftuar terrorizmin.
“Rusia i ka dhënë mbështetje popullit sirian”, tha ai, “pa të cilën, Shteti Islamik do të kishte marrë edhe më shumë territore”.
“Rusia dhe Katari mbështesin zgjidhjen politike të krizës siriane, të pranuar nga populli sirian”, tha ministri i Jashtëm i Katarit, duke shtuar se shpresohej që ushtria siriane të dilte të ndihmë të popullit, por në vend të kësaj ajo hedh bomba mbi gra dhe fëmijë. /tesheshi.com/
