Takim i jashtëzakonshëm më 14 Shtator: Europa pritet të reagojë ndaj krizës së refugjatëve

Kriza e emigrantëve mbledh më 14 shtator ministrat e Brendshëm të BE-së në një takim të jashtëzakonshëm ku pritet të diskutohen mënyrat për të reduktuar fluksin, por edhe për t’u ardhur në ndihmë me mijëra refugjatëve.

Takimi është thirrur nga Luksemburgu që mban presidencën e radhës së Bashkimit Europian, e në ftesën për takimin e jashtëzkonshëm thuhet se Europa duhet të ketë një përgjigje përballë këtij fluksi të madh emigrantësh.

“Situata e emigracionit brenda dhe jashtë kufijve të Bashkimit Europian është duke marrë përmasa të mëdha. Për të vlerësuar situatën, veprimet politike dhe për të diskutuar hapat që duhet të ndërmerren, ministri i Imigracionit dhe Azilit, Jean Asselborn ka vendosur të thërrasë një takim të jashtëzakonshëm të Këshillit të JHA-së”, thuhet në deklaratë.

Këshilli i Drejtësisë dhe Çështjeve të Brendshme që zakonisht mblidhet çdo tre muaj përbëhet nga ministrat e Brendshëm ose të Drejtësisë të 28 vendeve anëtare të Bashkimit Europian.

Ky takim vjen në një kohë incidentesh të rënda, ku me qindra refugjatë kanë humbur jetën në det ose në rrugëtimin me kamionë brenda Europës. /tesheshi.com/