Gaddafi paraqiti kandidaturën e tij më 14 nëntor në zyrën e Komisionit të Lartë Zgjedhor Libian në qytetin e Sebhi (EPA).
Është refuzuar kandidatura e paraqitur për zgjedhjet presidenciale në Libi nga Saif al-Islam Gaddafi, djali i liderit të rrëzuar libian Muammar Gaddafi, raporton Anatolia.
Zgjedhjet presidenciale të Libisë janë shpallur për 24 dhjetor dhe një zyrtar libian i paidentifikuar tha se Saif al-Islam Gaddafi u eliminua nga gara për shkak se ishte dënuar në atë vend.
Gaddafi paraqiti kandidaturën e tij më 14 nëntor në zyrën e Komisionit Suprem Zgjedhor të Libisë në qytetin Sebhi. Ai është shpallur në kërkim nga Gjykata Penale Ndërkombëtare me akuzën e krimeve kundër njerëzimit.
Prokuroria Ushtarake Libiane lëshoi gjithashtu një urdhër për arrestimin e tij me akuzën e vrasjes dhe përdorimit të mercenarëve.
Komisioni i Lartë Zgjedhor i Libisë thotë se deri më tani 56 persona janë nominuar për zgjedhjet presidenciale.
Në mesin e personave që paraqitën kandidaturat e tyre është edhe kreu i Qeverisë së Unitetit Kombëtar të Libisë, Abdul Hamid Dbeibeh.
Udhëheqësi i forcave të armatosura të paligjshme në lindje të Libisë, Khalifa Haftar, gjithashtu paraqiti kandidaturën e tij.
Të premten në Tripoli u mbajt një protestë kundër kandidaturës së Gadafit dhe Haftarit.
Sipas marrëveshjes së arritur nga Forumi i Dialogut Politik Libian me ndërmjetësimin e Kombeve të Bashkuara në nëntor të vitit të kaluar, zgjedhjet presidenciale dhe parlamentare në Libi do të mbahen më 24 dhjetor.
Partitë kundërshtare në Libi nuk kanë arritur ende një konsensus për kornizën ligjore për mbajtjen e zgjedhjeve parlamentare dhe kjo është një çështje që pritet të zgjidhet në periudhën e ardhshme. /tesheshi.com/
