Rezultatet e një sondazhi të organizuar nga lëvizja Fol në Kosovë e ku dalin shifra të larta të perceptimit të korrupsionit dhe performancës së dobët të qeverisë, konsiderohen “të turpshme” nga ambasadori britanik në Prishtinë. I pranishëm në publikimin e rezultateve, O’Connell nënvizoi se zyrtarë të institucioneve të Kosovës janë deklaruar për luftë kundër korrupsionit, por rezultatet nuk tregojnë progres.
Sondazhi i Fol “flet” se 52.80 për qind e të anketuarve kanë problem kryesor, papunësinë, rreth 39 për qind e tyre mendojnë se korrupsioni është një nga problemet kryesore sikundër performanca e dobët e qeverisë konsiderohet problem i madh në rreth 34 për qind.
Qytetarët mendojnë se korrupsioni është më i përhapur në qeveri, në 40 për qind të të anketuarve.
Rreth 32 për qind e qytetarëve kanë pranuar se kanë dhënë para apo dhurata për të marrë shërbime në institucionet publike.
“Rezultatet e raportit janë të turpshme dhe të papranueshme, të cilat pengojnë zhvillimin ekonomik. Qeveria e Britanisë është e interesuar që Kosova të jetë shtet i qëndrueshëm dhe ligjor”, tha O’Connell në koment të rezultateve të sondazhit. /tesheshi.com/
