Në Kosovë ende nuk mund të bëhet transplantimi i veshkave, çka detyron pacientët të shkojnë jashtë vendit për shërbime të tilla. Shkak për këtë situatë është mungesa e një ligji që do të mundësonte shërbime të tilla në fushën e shëndetësisë.
Ibrahim Rudhani nga Klinika e Nefrologjisë, e cila funksionon në kuadër të Shërbimit Spitalor dhe Universitar të Kosovës (SHSKUK) ka bërë të ditur se janë 126 pacientë nga Kosova që kanë bërë transplantin e veshkave jashtë vendit.
“Ministria e Shëndetësisë i ndihmon financiarisht pacientët që kanë probleme me veshkat për të bërë transplantin jashtë vendit, të cilët më pas i mbikëqyrim në Klinikën Nefrologjisë”, ka deklaruar Rudhani për gazetën “Zëri”.
Ai ka bërë të ditur se rreth 90 pacientë të rinj për çdo vit i nënshtrohen shërbimit të dializës, ndërsa numri i përgjithshëm i tyre është 830. /tesheshi.com/
