Në qytetin tragjik të Bosnjës, i kthyer tashmë në një arenë influencash, numërimi i kutive të mbetura të votimit për zgjedhjet lokale, do të kryhet live në Tv, ngjashëm si me kutitë e fundit të zgjedhjeve lokale të vitit 2011 në Tiranë, tek njësia nr.5, pikërisht aty u luajt finalja e duetit Rama – Basha.
Tashmë, pesë kutitë e votimit të kontestuara në Srebrenicë u dërguan në një depo të Komisionit Qendror Zgjedhor (KQZ) në Sarajevën lindore.
Këtë fakt ka konfirmuar zëdhënësi i KQZ-së, Maksida Piriç.
“Janë marrë materialet zgjedhore nga Komisionit Zgjedhor Komunal i Srebrenicës, por edhe i komunave të tjera: Bratunac, Milici, Vlasenica, Sekovçc.
Nesër do të kryhet numërimi i fletëvotimeve nga pesë vendvotime në Srebrenicë.
Në një qendër të centralizuar të numërimit në Sarajevë procesi do të zhvillohet me transmetim të drejpërsëdrejtë televiziv”, sqaroi Piriç.
Kandidati i pavarur por i mbështetur nga partitë muslimane-boshnjake, Qamil Durakoviç shpreson se nga këto kuti të dalë fitorja e tij pasi vendvotimet janë të përbërë kryesisht nga popullsi muslimane.
Pesë kutitë e Srebrenicës u mbajtën peng nga partitë serbe, të cilët përdorën forcën e pushtetit të Republika Srbska për të ndotur zgjedhjet.
Kjo ka shkaktuar indinjatën e komunitetit ndërkombëtar që i ka vëzhguar zjedhjet me detaje. /tesheshi.com/
