Dy deputetë nga Partia Pro-Kurde e Demokracisë Popullore dhe Barazisë (DEM) të Turqisë u takuan me Presidentin Rexhep Tajip Erdogan të enjten për të diskutuar mundësinë e nxitjes së një procesi paqeje mbi problemin kurd.
Pas takimit në pallatin presidencial në Ankara, delegacioni i DEM-it foli për një atmosferë jashtëzakonisht konstruktive dhe shpresëdhënëse dhe tha se “sot jemi më optimistë se dje”.
Anëtarët e delegacionit të përbërë nga Pervin Buldan dhe Siri Sureya Öder (i njëjti delegacion që vizitoi liderin e PKK Abdullah Öcalan në burgun e tij në ishullin Imrali javë më parë) deklaruan pas takimit se “rëndësia e procesit në vazhdim u konfirmua dhe hapat e ardhshëm u vlerësuan reciprokisht”.
Ata gjithashtu theksuan: “Ne theksuam se një periudhë pa dhunë dhe konflikt, gjatë së cilës do të forcohet hapësira demokratike dhe politike, është jetike për vendin tonë, qytetarët tanë dhe rajonin tonë. Delegacioni ynë dhe partia jonë do të vazhdojnë të punojnë drejt zbatimit e ‘Ftesës për Paqe dhe Shoqëri Demokratike’ me dëshirë dhe vëmendje edhe më të madhe se dje, se sot jemi optimist se në të gjithë periudhën e ardhshme”.
Bisedimet janë pjesë e procesit që filloi pas thirrjes së Abdullah Ocalan për çarmatimin dhe vetëshpërbërjen e Partisë së Punëtorëve të Kurdistanit (PKK), të cilën ai e themeloi në 1978.
Apeli i Oçalan pasoi propozimin, më 22 tetor të vitit të kaluar, nga partneri i qeverisë së Presidentit Erdogan dhe udhëheqësi i Partisë së Veprimit Nacionalist, Devlet Bahçeli, për lirimin e Oçalanit nën kushte rreptësisht kufizuese nëse ai heq dorë publikisht nga veprimet e armatosura në Asamblenë Kombëtare dhe u bën thirrje anëtarëve të PKK-së të shpërndajnë organizatën.
Oçalan bëri thirrje për çarmatimin dhe vetëshpërbërjen e PKK-së më 27 shkurt dhe PKK ka shpallur armëpushim që nga 1 marsi, megjithatë, raportet tregojnë se disa përleshje sporadike midis ushtrisë turke dhe anëtarëve të PKK-së kanë ndodhur në Irakun verior. /tesheshi.com/
