Gati 1000 pilotë luftarakë izraelitë në pension dhe rezervë i kanë kërkuar qeverisë në një letër të hapur që t’i japë përparësi lirimit të pengjeve të mbetura në Gaza, edhe nëse kjo nënkupton ndalimin e luftës kundër Hamasit.
Një zyrtar ushtarak izraelit tha se nënshkruesit që janë në detyrë aktive do të shkarkohen për shkak të letrës, e cila thotë se lufta, të cilën Izraeli rifilloi muajin e kaluar pas një armëpushimi dy mujor, “kryesisht u shërben interesave personale dhe politike sesa nevojave reale të sigurisë”.
Në reagim, kryeministri Benjamin Netanyahu tha këto ishin “deklarata të pafalshme” që dobësojnë ushtrinë izraelite dhe forcojnë “armiqtë tanë në kohë lufte”.
Letra, e cila u publikua nga disa media izraelite, u nënshkrua nga 980 rezervistë, tha një nga nënshkruesit për Reuters.
Letra kërkon “kthimin e menjëhershëm të të gjithë pengjeve tanë pa vonesë, edhe me çmimin e ndalimit të menjëhershëm të luftës”.
Familjet e pengjeve, kundër Netanyahut
Muajin e kaluar, Izraeli i dha fund armëpushimit të arritur në janar. Izraeli tha se operacionet e tij ushtarake do të vazhdojnë derisa të kthehen 59 pengjet e mbetura që ende mbahen nga Hamasi dhe grupet e tjera. Hamasi thotë se nuk do t’i lirojë ata pa një marrëveshje për t’i dhënë fund luftës përgjithmonë.
Familjarët e pengjeve dhe protestuesit i kanë bërë thirrje qeverisë së krahut të djathtë të Netanyahut të arrijë një marrëveshje me Hamasin për të liruar pengjet, edhe me ccmimin që Izraeli të tërhiqet plotësisht nga Gaza dhe t’i japë fund konfliktit.
Netanyahu thotë se Izraeli do të vazhdojë të luftojë derisa të arrihen të gjitha qëllimet e tij, duke përfshirë privimin e Hamasit nga aftësia për të sunduar Gazën dhe se një qasje e tillë përfundimisht do të lirojë pengjet.
Një zyrtar ushtarak izraelit tha se nuk kishte vend për “rezervistët në detyrë aktive për të shfrytëzuar statusin e tyre ushtarak për qëllime politike duke marrë pjesë në të njëjtën kohë në luftime”. Zyrtari e quajti letrën “një shkelje serioze e besimit midis komandantëve dhe vartësve”.
Një sondazh i publikuar të enjten nga Instituti Demokratik i Izraelit tregoi mbështetje në rritje për t’i dhënë përparësi lirimit të pengjeve në vend të eliminimit të Hamasit.
Sondazhi tregon se 68 përqind e izraelitëve besojnë se kthimi i pengjeve në shtëpi duhet të jetë prioriteti kryesor. /tesheshi.com/
