Zyra Postare Gjermane i ka kushtuar një seri të veçantë pullash grupit nga Hanoveri, me rastin e 60-vjetorit të tyre – një homazh që rrallë jepet gjatë jetës së tyre. Scorpions mbushin sallat në të gjitha kontinentet, shkruan DPA.
Çfarë i bëri ata kaq të suksesshëm – është pyetja me rastin e koncertit të vetëm në stadium që do të kenë në Gjermani këtë vit – pikërisht këtë të shtunë.
Në shtator të vitit 1989, këngëtari i Skorpions, Klaus Meine, kompozoi një këngë, videoja e së cilës është parë më shumë se 1.1 miliardë herë në YouTube deri më sot.
Balada simbolizon fundin e Luftës së Ftohtë dhe rënien e Murit të Berlinit më 9 nëntor 1989. Meine i tha DPA-së se e shkroi këngën “Wind of Change” në studion e tij në shtëpi pranë Hanoverit. Meqenëse nuk kishte kitarë në dorë në atë kohë, ai e luajti intro-n me fishkëllimë.
Një podcast i vitit 2020 shqyrton një thashethem se autori nuk është në të vërtetë Meine, por CIA – gjoja me qëllim tërheqjen e Bllokut Lindor në mënyrën perëndimore të jetesës dhe ndihmën në rënien e komunizmit. Por për këngëtarin kjo është qesharake, sigurisht.
Ai thotë se u frymëzua nga një performancë në Festivalin e Paqes në Moskë para 250,000 njerëzve. Ideja i lindi ndërsa udhëtonte me një varkë në lumin Vollga. “Wind of Change” ishte, siç thotë ai, “një kolonë zanore për Glasnostin dhe Perestrojkën” – reformat në Bllokun Lindor. Skorpions ishin një nga grupet e para perëndimore që performuan në Bashkimin Sovjetik.
Forca lëvizëse pas grupit është Rudolf Schenker. Ai e themeloi grupin në vitin 1965, kur ishte vetëm 17 vjeç. Kjo konfirmohet nga libri i shpenzimeve shtëpiake i nënës së tij, i zbuluar së fundmi – sepse ai mori para hua nga prindërit e tij për instrumente.
Që në vitin 1969, ai deklaroi se Skorpions një ditë do të ishin ndër 30 grupet më të mira në botë.
“Rock and roll ka të bëjë me energjinë. Energjia është ajo që e përshkoi të gjithë grupin”, tha Schenker 45 vjet më vonë në një intervistë me DPA.
Në vitin 1969, Maine u bë solist. Në vitin 1978, kitaristi Matthias Jabs iu bashkua atyre, i cili ndihmoi në formësimin e tingullit të njohur të Skorpions.
Grupi arriti suksesin e tij më të madh pas një problemi serioz. Kjo pasi në fillim të viteve tetëdhjetë, Maine humbi zërin e tij karakteristik dhe të qartë dhe iu desh t’i nënshtrohej një operacioni. Nuk ishte e sigurt nëse ai do të këndonte përsëri.
Ai mori një vit pushim dhe, pas shërimit të tij, në vitin 1984 pasuan hite botërore si “Still Loving You” dhe “Rock You Like A Hurricane”. Për një kohë të gjatë, në Gjermani nuk u vu re se Skorpions ishin yje botërorë. Ndoshta sepse ata jetonin pranë Hanoverit midis 5,000 koncerteve të tyre.
“Mentaliteti i Gjermanisë veriore na ndihmon, na mban të qëndrueshëm“, thotë Meine. “Ajo gjëja ‘Unë jam një yll’ është e pakuptimtë. Unë jam një këngëtar, një muzikant, një kompozitor. Kemi parë shumë yje të rremë të vijnë e të shkojnë.”
Këngëtari 77-vjeçar i dërgoi së fundmi një shënim dashurie gruas së tij Gabi në një shfaqje – ata janë të martuar prej 48 vitesh.
Sigurisht, Skorpions nuk janë të vetmit yje Rock-u në pension që performojnë në skena të mëdha. Interesante është se ata njoftuan tërheqjen e tyre rreth 15 vjet më parë, por ndryshuan mendje pas koncertit të lamtumirës në vitin 2012.
Koncertet në të gjithë botën me mijëra fansa, shpesh shumë më të rinj, janë eliksiri i rinisë për pesë muzikantët.
“Turnetë na e mbajnë zemrën të re”, thotë Klaus Meine. Shenker thotë se do të performojë “për aq kohë sa këmbët e tij mund ta mbajnë”.
Kujtojmë se Scorpions do jepnin një koncert dhe në Tiranë në fillim të viteve 2000, ftuar nga Edi Rama, i cili sapo kishte nisur të qeveriste Tiranën. /tesheshi.com/
