“Ka vende të interesuara në vazhdimin e përshkallëzimit të tensioneve”, pohoi nënkryetari i parlamentit sllovak, Tibor Gašpar.
Gaspar, në një intervistë për mediat ruse, deklaroi se i duket sikur Evropa ende nuk e ka kuptuar se ka pasur një ndryshim në politikën e SHBA-së ndaj Rusisë.
“Ka vende të interesuara në vazhdimin e përshkallëzimit të tensioneve dhe mendoj se këto qëllime për të dërguar ushtarë të NATO-s në Ukrainë janë diçka që mund të çojë në një luftë të re botërore. Megjithatë, nuk mendoj se ka një konsensus për këtë çështje në vendet evropiane”, tha ai.
Ai theksoi se Franca dhe Mbretëria e Bashkuar janë mbështetësit kryesorë të kësaj ideje, por ai është i mendimit se vendet e mbetura evropiane e kuptojnë rrezikun e dërgimit të trupave në Ukrainë sepse “një veprim i tillë do të shkaktonte një konflikt të madh në Evropë”.
Ai shtoi se vendet evropiane aktualisht kanë humbur konkurrueshmërinë e tyre ekonomike për shkak të sanksioneve kundër Rusisë.
Zëdhënësi i Kremlinit, Dmitry Peskov, tha më 24 prill se vendosja e kontingjenteve ushtarake perëndimore në Ukrainë ishte e papranueshme për Rusinë. Ai gjithashtu vuri në dukje se kjo iniciativë përfaqëson një kërcënim kritik për sigurinë e të gjithë Evropës. /tesheshi.com/
