Donald Trump ka thënë se po urdhëron administratën e tij të rihapë dhe zgjerojë Alcatrazin, një ish-burg në një ishull pranë brigjeve të Kalifornisë.
Në një postim në platformën Truth Social, Presidenti i SHBA-së Donald Trump pohoi se “Amerika është pllakosur nga shkelës të përsëritur mizorë dhe të dhunshëm për një kohë shumë të gjatë”.
Rihapja e Alcatrazit do të shërbente si një “simbol i ligjit, rendit dhe drejtësisë”, shkruan ai.
Burgu u mbyll në vitin 1963, dhe sot Ishulli Alcatraz funksionon si një atraksion turistik. Ndodhet pranë Urës Golden Gate në San Francisko.
“Sot po i drejtoj Byrosë Federale të Burgjeve, së bashku me Departamentin e Drejtësisë, FBI-në dhe Departamentin e Sigurisë Kombëtare, që të rihapin, zgjerojnë ndjeshëm dhe rinovojnë ALCATRAZ-in”, shkroi Trump.
Sipas tij, burgu do të ishte i destinuar për “kriminelët më mizorë dhe të dhunshëm në Amerikë”.
Si kujtesë, Trump është aktualisht në mes të një konflikti me gjykatat amerikane për shkak të politikës së tij për dërgimin e anëtarëve të dyshuar të bandave në një mega-burg në El Salvador. Në mars, ai dërgoi atje më shumë se 200 anëtarë të dyshuar të bandave nga Venezuela. Ai foli gjithashtu për idenë e dërgimit të “kriminelëve vendas” në burgjet e huaja.
Alcatraz fillimisht ishte një fortesë ushtarake, dhe në fillim të shekullit të 20-të u shndërrua në një burg ushtarak. Departamenti i Drejtësisë e mori atë në vitet 1930, kur filloi të pranonte të dënuar nga sistemi federal i burgjeve. Ndër të burgosurit më të famshëm ishin gangsterët famëkeq Al Capone, Mickey Cohen dhe George “Mitralioz” Kelly.
Burgu u promovua më tej nga filmi i vitit 1962 “Birdman of Alcatraz” me protagonist Burt Lancaster, i cili përshkruan vrasësin e dënuar Robert Stroud, i cili, ndërsa vuante një dënim me burgim të përjetshëm në ishull, zhvilloi një interes për zogjtë dhe u bë ekspert në ornitologji. Më vonë, në vitin 1979, u realizua filmi kult “Alcatraz”, i cili tregonte një përpjekje për arratisje nga burgu famëkeq, me protagonist Clint Eastwood.
Alcatraz shërbeu gjithashtu si vendngjarje për filmin e vitit 1996, “The Rock”, me aktorët kryesorë Sean Connery dhe Nicolas Cage, që flet për një ish-anëtar të SAS dhe një kimist të FBI-së që shpëtojnë pengje në ishull.
Burgu u mbyll sepse ishte shumë i kushtueshëm për t’u mirëmbajtur, sipas Byrosë Federale të Burgjeve. Kostot e tij operative ishin pothuajse tre herë më të larta se çdo burg tjetër federal, kryesisht për shkak të vendndodhjes së tij në ishull. /tesheshi.com/
