Inteligjenca izraelite dhe burimet ushtarake kanë zbuluar qasjen e ushtrisë okupuese sioniste për të shënjestruar objektivat në luftën aktuale në Rripin e Gazës. Burime, duke përfshirë disa oficerë në Forcat e Mbrojtjes të Izraelit (IDF), kanë pranuar se ushtria okupuese sioniste po synon qëllimisht dhe në një shkallë të gjerë civilët palestinezë, të gjitha me synimin për të penguar dhe përjetësuar traumat në shoqërinë palestineze. Në vazhdim ju përcjellim pjesë të hulumtimit të gjerë mbi arsyet e viktimave masive të civilëve në Gaza, të publikuar nga revista izraelite 972+.
Sipas gjetjeve të hetimit të lartpërmendur, në luftën aktuale në Gaza, ushtria izraelite ka zgjeruar ndjeshëm sulmet e saj ndaj objektivave joushtarake, si ndërtesat publike dhe rezidenciale – ato që ushtria i quan “Objektivat e Fuqisë”, por edhe ndaj atyre private siç janë shtëpitë e banimit. Në një nga rastet, komanda ushtarake, sipas informacioneve të marra nga 972+, autorizoi bombardimin e qindra civilëve në përpjekje për të eliminuar një nga zyrtarët e Hamasit.
“Kjo është ndoshta një nga arsyet pse ka një përqindje kaq të lartë të fëmijëve dhe grave në mesin e viktimave palestineze. Më shumë se 300 familje në Gaza humbën më shumë se dhjetë anëtarë të tyre në bombardimet”, sipas 972+.
Vrasja e civilëve për të kursyer kohë
Pesë burime të ndryshme, të cilët ishin të përfshirë në operacionet e mëparshme në Gaza, thanë se numri i civilëve që mund të vriteshin në çdo sulm ndaj shtëpive private dhe ndërtesave të banimit ishte llogaritur paraprakisht dhe i njohur për shërbimet e inteligjencës.
“Ka raste kur ne bombardojmë në mënyrë të pasaktë, nuk e dimë saktësisht se ku është objektivi, ne bombardojmë gjerësisht, vrasim civilë në atë mënyrë dhe për arsye të kursimit të kohës”, tha burimi për 972+.
“Asgjë nuk ndodh rastësisht,” tha një burim i inteligjencës i cili ishte i përfshirë në operacionet e mëparshme në Gaza. “Kur një vajzë trevjeçare u vra në Gaza në një shtëpi, ishte sepse dikush në ushtri vendosi që nuk ishte keq që ajo të vritej. Ne nuk jemi Hamasi. Këto nuk janë raketat e tyre. Gjithçka është e synuar dhe e saktë. Ne e dimë saktësisht se sa dëme aksidentale ka në çdo shtëpi”.
“Ata na kërkojnë të synojmë ndërtesat e larta që mund të lidhen me Hamasin. Kuptova se kjo qasje i lejon ushtrisë të shkaktojë shumë shkatërrime në Gaza. Kështu na thanë”, tha një nga burimet e hulumtimit të përmendur. “Shkretimi i të gjithë ndërtesës shumëkatëshe bëhet për të dëmtuar familjet që jetojnë në të dhe në këtë mënyrë për të ushtruar presion mbi organizatat terroriste… Qëllimi i sulmit ndaj objektivave të tillë është një sulm i qëllimshëm ndaj civilëve, synimi për të detyruar qytetarët e Gazës të kthehen kundër Hamasit”.
Inteligjencën artificiale për të zgjedhur objektivat e bombardimeve në Gaza
Agresioni aktual i Izraelit kundër Gazës ka ofruar një mundësi të paprecedentë për IDF-në që të përdorë inteligjencën artificiale për të shënjestruar në masë objektivat e sulmit. Një platformë për vendosjen e objektivave të inteligjencës artificiale e quajtur “Gospel” ka përshpejtuar ndjeshëm identifikimin e objektivave vdekjeprurëse, të cilat ekspertët izraelitë e krahasuan me një “fabrikë”.
Sistemi i automatizuar e ka bërë shumë më të lehtë për inteligjencën izraelite marrjen e vendimeve gjatë operacioneve ushtarake, duke përfshirë llogaritjen e viktimave të mundshme. Pesë burime të ndryshme kanë konfirmuar se numri i civilëve që mund të vriten në sulme është i njohur paraprakisht për inteligjencën izraelite dhe duket qartë në dosjen e objektivit nën kategorinë e “dëmtimit kolateral”.
Sipas këtyre burimeve, ka shkallë të dëmtimit kolateral me të cilin ushtria përcakton nëse është e mundur të sulmohet një objektiv. “Kur direktiva e përgjithshme bëhet ‘Dëmi kolateral 5’, kjo do të thotë se ne jemi të autorizuar të godasim të gjitha objektivat që do të vrasin pesë ose më pak civilë – ne mund të veprojmë ndaj të gjitha objektivave që kanë pesë ose më pak,” tha një nga burimet.
“Kjo është një makinë që, me ndihmën e inteligjencës artificiale, përpunon shumë të dhëna më mirë dhe më shpejt se çdo njeri dhe i kthen ato në objektiva për sulm,” tha ish-shefi i shtabit të IDF Aviv Kochavi në një intervistë të gjerë me Ynet.
“Ne po përgatisim automatikisht objektivat dhe po punojmë sipas një liste kontrolli,” tha një nga burimet që ka punuar në departamentin e ri të administrimit të objektivit për +972. “Është vërtet si një fabrikë. Ne punojmë shpejt dhe nuk kemi kohë për të hyrë thellë në objektiv”.
Falë sistemeve ushtarake të inteligjencës artificiale, për herë të parë ushtria mund të gjenerojë objektiva të rinj më shpejt se sa sulmon. Kërkesa për të gjeneruar automatikisht një numër të madh objektivash është realizimi i doktrinës “Dahi” (Doktrina ‘Dahi’ u formulua gjatë Luftës së Libanit të vitit 2006. Parimi kryesor ishte: sulme joproporcionale, përfshirë ato kundër strukturave dhe infrastrukturës civile). /tesheshi.com/
