Vit paz viti, Shqipëria po zbulon vetveten karshi të huajve me bukuritë dhe veçantitë e saj natyrore dhe historike. Së fundi, është ishulli i Sazanit që është vënë në fokus të interesit për ta vizituar. E pagëzuar si “Sazan Island”, ky ishull pritet të jetë zbulimi i kësaj vere, siç shkruan “Khaleej Times”, një e përditshme e Emirateve të Bashkuara në gjuhën angleze:
I projektuar për t’i bërë ballë një pushtim perëndimor, ishulli shqiptar i Sazanit tani shpreson të tërheqë turistë të shumtë.
Këtë verë, Shqipëria planifikon të prezantojë atë që shpreson të bëhet një vend i ri selfiesh për turistët: Sazan Island, një bazë ushtarake që ende ka bunkerë dhe tunele, projektuar për t’i bërë ballë një sulm bërthamor.
“Ai që dikur ishte një vend i izoluar, një mister për pothuajse të gjithë shqiptarët, tani mund të kthehet në një vend tërheqës, posaçërisht për turistët e huaj”, thotë Auron Tare, Drejtor i Agjencisë Kombëtare të Bregdetit të Shqipërisë.
