Shqipëria me Kroacinë kanë dhuruar ndeshjen më dramatike të Europianit deri më tani, duke u ndarë me një barazim 2-2, një ndeshje që mund të ishte fituar nga kuqezinjtë.
Si me Italinë, ishte Shqipëria që kaloi në avantazh, që në minutën e 11 me Qazim Laçin, duke bërë që pjesa e parë të mbyllej në avantazh.
Por e dyta solli përmbysjen dëshpëruese. Kroatët shënuan dy gola në dy minuta. Ndodhi kjo teksa Shqipëria humbi disa mundësi të pastra për gol me anë të kundërsulmeve. Dhe në fund të ndeshjes, teksa po regjistrohej humbja e dytë me të njëjtin rezultat, një sulm i mirëstrukturuar çoi në golin e barazimit me anë të Gjasulës.
Ishte një përballje ndër më energjiket deri më tani, ku Shqipëria luftoi fort për topin e parë, me një Kroaci që gjendet në krye të futbollit botëror dekadën e fundit. /tesheshi.com/
