Ashtu siç pritej, në daljen e tij të parë para medias për vitin 2016, kreu i Rendit Saimir Tahiri, e konsideroi si të suksesshme luftës ndaj paligjshmërisë dhe kriminalitetit përgjatë 2015-ës, duke e mbështetur këtë në shifra, që sipas tij janë tejet pozitive.
Por sipas ministrit të Brendshëm, arritja më e madhe është krjimi i një klime besimi tek qytetarët ndaj Policisë së Shtetit.
“Numri i telefonatave është mbi 194 000, pra mbi 500 telefonata në ditë, gjë që tregon besimin e qytetarit ndaj shtetit. Tregon edhe gatishmërinë e qytetarit për të pasur partner policinë në zgjidhjen e problemeve. Aplikacioni i Komisariatit Dixhital është shkarkuar mbi 35 mijë herë. Falë transparencës dhe punës në shërbim të qytetarëve, është rritur besimi i tyre ndaj Policisë së Shtetit”, tha Tahiri.
Sa i përket klimës së kriminalitetit, ministri Tahiri serviri shifrën e 54 vrasjeve duke thënë se ky është numri më i ulët në krahasim me çdo vit në këto 25 vitet e fundit. “Të ruajmë këtë tendencë suksesi edhe në vitet në vijim”, shtoi ai. /tesheshi.com/
