Ka kaluar tangent një lajm i rëndësishëm për mediat shqiptare. Prokuroria e Krimeve të Rënda ka sekuestruar pasurinë e një grupi të fuqishëm në Fier, atë të Fatmir Kajollit, i cili për 20 vite ka qenë njeriu që vendoste gjithçka që kishte të bëntë thuajse me të gjitha të mirat apo të ardhurat që gjeneroheshin në Fier.
Me ndihmën e politikës, kryesisht duke përfituar nga miqësia e ngushtë me Fatmir Mediun, Fatmir Kajolli administroi gjithçka ishte publike në Fier, që nga baret, restorantet, klubi i sportit Apollonia dhe më në fund u merrte lekë qytetarëve që parkonin makinat në rrugët e qytetit apo ndanë pallatet. Falë një kontrate apo projekti të miratuar nga ish-kryetari i bashkisë Baftjar Zeqo dhe këshilli bashkiak.
Por Fatmir Kajolli, që prej vitit 2011 është kërkuar me letër zyrtare nga drejtësia italiane për t`u ekstraduar pasi rezultonte i dënuar për trafikim droge dhe prostitucioni. Dhe paratë u investuan në qytetin e Fier: me toka turistike, pyje në hapësirën bregdetare të Semanit, deri dhe në rrugët e qytetit ku doli si tagrambledhës i çdo metri katror publik. Gjithçka sipas drejtësisë italiane mbulohej me para trafiku, por që u merrte frymën qytetarëve të Fierit.
Fatmir Kajolli ka qenë anëtar i këshillit bashkiak, si përfaqësuesi politik i opozitës, por realisht ka pasur pushtet më shumë se kaq. Dhe kur drejtësia italiane e kërkoi, ishte mazhoranca e atëhershme sot në opozitë që nuk e dorëzoi duke përdorur influencën në drejtësi. Influencë që e trashi zullumin dhe e sjell si një argument jo shumë të besueshëm të ashtuquajturën kauzë të dekriminalizmit.
Nëse do të duhet të heqësh dorë nga njerëzit me rekordet kriminale, Lulzim Basha e Fatmir Mediu, duhet të mos i jepnin asnjë mandat politik Fatmir Kajollit, por t’i hapnin rrugë drejtësisë e cila kishte një kërkesë me detyrim/përcaktim për të zbatuar vendim, jo thjesht dyshim ndaj një politikani.
Ndaj, përveç frymëmarrjes së lirë të fierakëve, vendimi i Prokurorisë së Krimeve të Rënda për të sekuestruar pasurinë që sipas gjykatave italiane është vënë me para trafiqesh, përbën një precedent pozitiv për drejtësisë shqiptare dhe realisht inkurajon qytetarët, që normalisht presin për më tepër.
Politika ka vetëm një detyrë: të heqë dorë nga këta njerëz, jo me fjalë për realisht!
P.S. Nëse opozita e djeshme do përdorte gjuhën e të sotmes duke shenjuar prezencën e krimit në politikë, padyshim që personi më përfaqsues do ishte Fatmir Kajolli.
Tek sekuestroja e pronave të Fatmir Kajollit, mu pse këtë e ka ndërmarrë drejtësia shqiptare, ekzistojnë shumë arsye që ky lajm të ishte në krye të skaletave të redaksive.
Tek sekuestroja e pronave të Fatmir Kajollit, ka shumë arsye për ta shenjuar 30 tetorin 2015 si datë historike: “Almanak: më 30 tetor të vitit 2015, drejtësia shqiptare vendosi sekuestro ndaj pronave të shtetasit Fatmir Kajolli, një drejtësi deri atë çast e gjunjëzuar nga politika dhe prezenca e krimit në të…..” /tesheshi.com/
