SHBA ka goditur sërish në Maqedoni, duke sanksionuar biznesmenin e njohur të atyshëm Jordan “Orce” Kamçev.
“Kamçev abuzoi me pozitën e tij, duke u angazhuar në aktivitete korruptive dhe duke ndjekur një axhendë egoiste në kurriz të institucioneve demokratike dhe qytetarëve të Maqedonisë së Veriut”, tha nënsekretari i Thesarit për Terrorizëm dhe Inteligjencë Financiare, Brian E. Nelson.
Raportohet se Jordan “Orce” Kamçev (Kamçev) është angazhuar gjerësisht në korrupsion, duke përfshirë shpërdorimin e detyrës, pastrim parash dhe vepra të tjera për më shumë se një dekadë duke filluar nga fillimi i viteve 2000.
Kujtohet se në vitin 2022, Kamçev u dënua në gjyqin “Parcelat e Tokës Vodno” për pjesëmarrje në një skemë pastrimi parash të lidhur me një blerje të paligjshme toke.
Në një gjyq të veçantë, Kamçev u deklarua fajtor për shpërdorim të rëndë të detyrës në “Çështjen e Perandorisë”, në të cilën ai dyshohej për shoqërim kriminal, mashtrim, pastrim parash dhe krime të tjera që lidhen me bizneset e tij.
Për më tepër, Kamçev thuhet se përdori ndikimin dhe pasurinë e tij korruptive për të manipuluar sistemin gjyqësor të Maqedonisë së Veriut në favor të tij.
Në zbërthim të sanksioneve, thuhet se të gjitha pronat dhe interesat në pronën e personit të caktuar të përshkruar më sipër që janë në Shtetet e Bashkuara ose në zotërim ose kontroll të personave amerikanë janë bllokuar dhe duhet të raportohen në OFAC.
Gjithashtu, çdo subjekt që është në pronësi të drejtpërdrejtë ose të tërthortë, individualisht ose në total, 50 për qind ose më shumë nga një ose më shumë persona të bllokuar gjithashtu bllokohet.
Ndalimet përfshijnë dhënien e çdo kontributi ose ofrimin e fondeve, mallrave ose shërbimeve nga, për, ose në dobi të çdo personi të bllokuar, ose marrjen e ndonjë kontributi ose ofrimin e fondeve, mallrave ose shërbimeve nga çdo person i tillë.
Kujtohet gjithashtu se Jordan Kamçev është drejtor i kompanisë “ Orka Holding”, e themeluar në vitin 1990 nga babai i Jordan Kamçevit, Ilija Kamçev.
“Orka Holding” është aksionere e kompanive më të mëdha në Maqedoni, si spitali “Acibadem Sistina”, kompania e ndërtimit “Beton Shtip”, “Stopanska Banka”, kombinatin bujqësor “Pelagonija”, “OK Hotel”, restorantin elitar “Sushiko”, pronar i gazetës së përditshme “Nova Makedonija”, etj.
Ai njihet për publikun si një nga njerëzit më të afërt të ish-Drejtorit për Siguri dhe Kundërzbulim, Sasho Mijallkov. /tesheshi.com/
