Serbët e Kosovës kanë deklaruar se do të vënë veton e tyre kushtetuese për të mos lejuar kthimin e Forcave të Sigurisë së Kosovës në ushtri.
Ministri për Kthim e Komunitete në Qeverinë e Kosovës, Dalibor Jevtiq ka thënë se serbët në institucionet e Kosovës nuk do ta përkrahin formimin e Ushtrisë së Kosovës.
“Ne për këtë temë kemi folur disa herë dhe kemi theksuar se ne nuk do ta përkrahim asnjë iniciativë të tillë. Po të kishim qenë të gatshëm të përkrahnim këtë iniciativë, kjo tashmë do të ishte vënë në rendin e ditës të Kuvendit të Kosovës”, ka thënë Jevtiq në një intervistë për TV Herc të Shtërpcës.
Ai ka folur edhe për formimin e Asociacionit të Komunave serbe, duke theksuar se formimin e tij e pret në gjysmën e parë të vitit që vjen.
Jevtiq mendon se në vitin 2016 nuk do të ketë zgjedhje në Kosovë. /tesheshi.com/
