Shpërthimi në qendër të Ankarasë ka lënë gjer tani më së paku 18 të vdekur e 45 të plagosur. Bilanci tragjik mund të rëndohet në orët në vijim, ndërsa ekipet mjekësore janë ende në vendngjarje. Mes të vdekurve e të plagosurve ka ushtarakë e civilë.
Një makinë-bombë e ka kryer shpërthimin. Ky është njoftimi më i fundit nga autoritetet lokale të Ankarasë. Në të njëjtën kohë, nuk ka më dyshime se ky është një akt i pastër terrorist.
Zëvendëskryeministri dhe, njëkohësisht, zëdhënësi i qeverisë, Numan Kurtulmush, pritet që pas pak minutash të japë një konferencë shtypi, ndërsa kryeministri i vendit ka anuluar vizitën në Bruksel.
Nuk ka vonuar të vijë dënimi i aktit terrorist dhe nga zëdhënësi i partisë në pushtet, AKP-së, Omer Çelik, i cili ka shkruar në Twitter, “Terrori ka sulmuar tradhtisht në Ankara. Ne e dënojmë me forcë këtë sulm.”
Po ashtu ambasadori i SHBA-ve në Turqi, John Bass, i ka shprehur ngushëllimet në të njëjtin rrjet social: “Thellësisht të pikëlluar, të tronditur nga sulmi terrorist në Ankara. Zemrat tona janë me të lënduarit nga ky akt, dhe lutjet tona shkojnë për ta.”
Richard Moore, ambasadori britanik në Turqi, do të shkruante gjithashtu në Twitter, “Mbretëria e Bashkuar qëndron krah për krah me Turqinë në këtë moment të vështirë. E dënojmë fund e krye terrorizmin.” /tesheshi.com/
