Nico Rosberg i është afruar akoma më tepër titullit kampion me fitoren e sotshme në pistën e Suzukës, në Çmimin e Madh të Japonisë. Diferenca mes tij dhe Hamilton-it ka vajtur tani në 33 pikë, e mjaftueshme për t’i bërë katër garat e mbetura me qetësinë e duhur.
Mercedes-i është shpallur kampion për konstruktorë pas kësaj gare, një fitore me të cilën është mësuar në tre sezonet e fundit. Makinat Mercedes mbeten ende të pamposhtura në pistë, edhe pse Red Bull-i e Ferrari janë përpjekur fort për t’i ngushtuar hendeqet.
Rosberg u nis i pari sot në Suzuka, për të mos e lëshuar për asnjë çast kreun. Gjermani ka fituar tre prej katër garave të fundit, duke qenë në ditët e tij më të mira. Kalimi i finishit si i pari ishte përfundimi logjik i një gare të kryer pa asnjë gabim.
Përndryshe, Hamilton pati një nisje katastrofike, duke përfunduar menjëherë në vendin e tetë. Në tatëpjetë qe gara më pas për të, e falë pilotimit të tij, por dhe një strategjie të shkëlqyer, ai ia doli të përfundonte i treti.
Piloti më i mirë i kësaj gare në Japoni u shpall djaloshi holandez Max Verstappen. I jashtëzakonshëm stili i tij i pilotimit. E jashtëzakonshme mënyra si e mbajti pas Hamilton-in për xhiro të tëra, për ta detyruar nga fundi dhe të dilte jashtë piste. I dyti në këtë garë, atë pa dyshim do ta shohim kampion në vitet që vijnë.
Shoku i tij te Red Bull-i, Ricciardo, nuk qe në një ditë të mirë, e reflektuar kjo me renditjen në vend të gjashtë.
Dy pilotët e Ferrari-t e nisën mirë garën, për t’u zmbrapsur me kalimin e minutave. Vettel e Raikkonen nuk mundën të marrin më shumë se një vend të katërt dhe të pestë, edhe pse në fillim u duk se podiumi ishte i mundshëm për ta.
Në vend të shtatë dhe të tetë përfunduan dy pilotët e Force India-s, Perez e Hulkenberg. I nënti në garë do të renditej Massa, e pas tij, Bottas.
McLaren Honda u kthye te ditët e errëta. Vetëm i 16-ti Alonso, me Button-in akoma më keq, dy pozicione më pas.
Gara pasuese është pas dy javësh, në Shtetet e Bashkuara të Amerikës. /tesheshi.com/
