“Fenomeni” që fitoi Botërorin 2002 me Brazilin, tashmë pronar i Valladolidit në Spanjë, e jeton futbollin nga një këndvështrim tjetër.
Ronaldo ka dhënë një intervistë të gjatë dhe ekskluzive për “Marca”-n spanjolle, duke i mëshuar një aspekti pak të njohur të jetës fubollistike: mendëve të kokës.
Braziliani iu referua çështjes së shëndetit mendor të futbollistëve, duke theksuar se po i nënshtrohet psikoterapisë. “Sot po bëj psikoterapi. Shikoj prapa dhe shoh se po, ne kemi qenë të ekspozuar ndaj shumë stresit mendor dhe pa u përgatitur për të.
Ishte gjithashtu fillimi i epokës së internetit. Gjatë kësaj kohe nuk kishte asnjë shqetësim për shëndetin mendor të lojtarëve. Sot ata janë shumë më të përgatitur, u jepet kujdesi mjekësor që u nevojitet edhe për të përballuar problemet e përditshme. Tani ata studiohen më shumë: profilet e tyre, si reagojnë, si duhet të reagojnë. Në kohën time nuk kishte asgjë nga këto.
Realiteti është se ne as nuk e dinim që ekzistonin këto lloj problemesh. Shëndeti mendor është injoruar plotësisht në brezin tonë. Shumë padyshim kanë kaluar kohë të këqija, madje edhe periudha depresioni, për shkak të mungesës së privatësisë, mungesës së lirisë. Është e vërtetë që problemet ishin shumë të dukshme, por zgjidhjet nuk ishin të gatshme”, shpjegoi braziliani.
“Brazili, gjithmonë favorit”
Ronaldo fitoi Kupën e Botës në 2002, arriti në finalen e 1998 dhe ishte në skuadrën e parë për Kupën e Botës 1994.
Pak para Botërorit të Katarit, ai thotë se “Brazili ka qenë dhe do të jetë gjithmonë favorit”.
“Me talentin që kemi duhet të jemi protagonistë. Është e vërtetë që evropianët luajnë futboll shumë të mirë, shumë dinamik, tërheqës dhe sulmues. Ndaj të jetë një garë klasike dhe historike mes evropianëve dhe amerikanëve jugorë.
Brazili dhe Argjentina përfaqësojnë shumë mirë kontinentin tonë, Amerikën e Jugut, por evropianët kanë luajtur dhe fituar Kupat e Botës që nga viti 2006. Franca, Gjermania, Spanja, Brazili, Argjentina, por nuk do të bëja asnjë parashikim. Unë u jap të gjitha këtyre skuadrave shanse të mëdha për të fituar”, tha ai.
“Fitimi i Kupës së Botës në 2002 është pa dyshim arritja më e madhe e karrierës sime”, përfundoi ai.
Kujtojmë që në finale ndaj Gjermanisë, ai shënoi të dy golat e fitores. /tesheshi.com/
