Nga Bardha Nergjoni
Quhet Romano Volgert, është 22 vjeç dhe ka lindur e jeton në Apeldoor të Hollandës. Vazhdon studimet në menaxhim-biznes dhe gjithashtu punon. Vjen për herë të parë në Shqipëri dhe do të rikthehet. I ka bërë përshtypje fakti se Shqipëria ka një aeroport të vogël dhe një qendër mjaft të bukur. I pëlqen ushqimi, njerëzit dhe moti i ngrohtë me diell.
Romano do të jetë tifozi i parë hollandez për Shqipërinë në Evropianin 2016. Megjithëse si çdo hollandezi i ka dhembur skualifikimi i Hollandës, ai e ka zgjedhur ekipin e tij të paktën për këtë Evropian. E ka zbuluar Shqipërinë në internet dhe e këshillon një vend për t`u vizituar. Do të rikthehet gjatë stinës së pushimeve me qëllimin për të shijuar edhe plazhet shqiptare.
Si po ju duket Tirana dhe ajo pak Shqipëri që keni parë?
Shumë e bukur. Aeroporti ishte pak e vogël por i këndshëm. Prisja një aeroport më të madh duke parë qytetin. Është hera ime e parë në Shqipëri dhe në këtë pjesë të Europës Jugore. Nuk kam pasur një arsye të vërtetë për të ardhur më parë.
Kam parë shumë njerëz që ecin në rrugë. Më pëlqen qendra apo bulevardi, godina e ministrive, xhamia. Ajo që më ka bërë më shumë përshtypje është godina e Teatrit të Operas. E madhe dhe e bukur.
Çfarë ju ka tërhequr më shumë në këto ditë qëndrimi?
Erdha me një kohë të mirë. Më pëlqen se si shqiptarët komunikojnë me turistët. Janë shumë të dashur. Më pëlqen ushqimi dhe është vërtet një vend me shumë gjallëri.
Do të riktheheni?
Ka shumë mundësi që të rikthehem në Tiranë për të shijuar, motin, ushqimin dhe njerëzit këtu.
A njihnit diçka më parë për Shqipërinë para se të vinit këtu?
Kam dëgjuar për ekipin e futbollit. Ekipi shqiptar është kualifikuar në Francë 2016 ndërsa ekipi ynë jo për fat të keq. Do jem tifoz me Shqipërinë sepse Spanja është skualifikuar, Italia nuk është shumë e besueshme, me Gjermaninë jemi “armiq” në futboll kështu që kam zgjedhur Shqipërinë.
Kur të ktheheni në vendin tuaj do të ftonit të tjerë të vizitonin Shqipërinë?
Sigurisht që do të përcjell përshtypjet e mia për Shqipërinë, për Tiranën. Shqipëria nuk është e shtrenjtë. Udhëtimet janë të lira dhe të arsyeshme. Njerëzit kursejnë për të bërë një udhëtim dhe nëse qëllimi do të ishte kjo pjesë e Evropës atëherë Shqipëria do të ishte vendi i duhur. /tesheshi.com/
