Takimi i G20-ës në Antalja të Turqisë po zhvillohet nën masa të rrepta sigurie, dhe axhenda e tij është ndikuar nga ngjarjet e fundit në Paris.
Ndër pjesëmarrësit, presidenti francez e pati lajmëruar anulimin e pjesëmarrjes së tij që mbrëmjen e së premtes, e në vend të tij gjendet ministri i Jashtëm, Laurent Fabius.
Siç bëhet e ditur nga agjencia Reuters, në një komunikatë që ende nuk ka marrë formë përfundimtare thuhet se udhëheqësit botërorë kanë rënë dakort se kriza e refugjatëve është një problem global, e se duhet trajtuar në një mënyrë të bashkërenduar.
“Ne u bëjmë thirrje të gjitha shteteve të kontribuojnë për t’i dhënë përgjigje kësaj krize dhe të ndajnë barrën e bashkëshoqëruar me të,” thuhet në këtë komunikatë, gjithnjë sipas Reuters-it.
Në komunikatë flitet për masa proaktive në lidhje me krizën e refugjatëve, përfshirë risistemimin e refugjatëve, ndihmën humanitare, përpjekjet që refugjatët të kenë shërbimet e domosdoshme, etj.
Mikpritësi, presidenti turk, Rexhep Tajjip Erdogan, ka theksuar në fjalën e tij se sulmet në Paris treguan se koha e fjalëve ka mbaruar tani.
Mbledhjet e G20-ës përqendrohen rëndom në çështjet ekonomike, por situata e nderë pas sulmeve në kryeqytetin francez e ka bërë të pashmangshëm diskutimin për çështjet e sigurisë.
Takimi i G20-ës do të vijojë dhe ditën e nesërme, ndërsa një numër i jashtëzakonshëm policësh dhe punonjësisht të sigurisë mbajnë nën kontroll të rreptë tërë hapësirën ku gjenden kryetarët e shteteve. /tesheshi.com/
