Në përvjetorin e radhës së “21 janarit”, ngjarjes tragjike që shenjoi rënien më pas të qeverisjes së Berishës dhe ardhjes në pushtet të Ramës, ky i fundit i ka përcjellë mesazh drejtësisë që të nxitojë në ndëshkimin e atij krimi politik me katër jetëhumbje.
“‘Drejtësia vonon po nuk harron’, thotë populli dhe sot kush po e vonon drejtësinë për 21 janarin, nuk duhet të harrojë se fëmijët e dëshmorëve po bëhen prindër duke pritur drejtësinë”, shkruan Rama.
Një ditë më parë, kreu i SPAK-ut Altin Dumani tha se po punohet me këtë dosje për të nxjerrë përgjegjësitë.
Më 21 janar 2011, një protestë e PS-së me shkak një videskandal korruptiv me protagonist Ilir Metën, aherë aleat qeverisës me Berishën, degradoi në një lloj tensioni prej akteve të dhunës, pasi turma hidhte sende drejt godinës qeveritare, deri në tentativa për sulm fizik. Reagimi shtetëror ishte i ashpër, me të shtëna direkt në mish, duke lënë katër të vdekur.
Berisha e mbrojti publikisht atë që ndodhi, njëherësh duke penguar hetimin e organeve të drejtësisë. Fillimisht mbrojti versionin se viktimat ishin qëlluar nga brenda vetë turmës, por më pas u bë e qartë se ishin qëlluar nga Garda. Kjo bëri që ai të lëviz të gjitha gurët për të penguar hetimin, gjë që dhe ndodhi.
Tashmë, mbi të qëndron “kërcënimi” i hetimeve nga SPAK, të cilat mund t’i kushtojnë shtrenjtë, pasi është një ngjarje pa shumë hije; pothuajse e gjitha është e qartë: Berisha ka urdhëruar të qëllohet direkt në mish. /tesheshi.com/
