Reali i Madridit rezultoi të jetë i pakalueshëm për Romën në takimin e parë eliminator mes dy skuadrave në kuadër të 1/8-ave të Champions League-s. Fitorja e mbrëmshme e madrilenëve në “Olimpico” të Romës u jep atyre epërsi në duelin me romanët, duke i bërë të jenë të avantazhuar në takimin e dytë të 8 marsit.
Skuadrat ishin shumë të kujdesshme gjatë pjesës së parë të lojës, duke mos krijuar kështu raste për shënim. Kundërsulmet ishin arma e vetme që kishin zgjedhur për të luftuar të dy ekipet, por rrjetat mbetën të paprekura gjatë këtyre 45 minutave.
Ndryshe nga pjesa e parë, skuadrat u shfaqën më kërkuese në fraksionin e dytë të lojës. Mundësia e parë u takoi romanëve, që e kërcënuan portën mike me El Shaarawy-n. Italiani i natyralizuar nisi një aksion personal nga e majta, por e lëshoi shumë topin para në momentin e gjuajtjes, dhe kjo bëri që të ndërhynte portieri i Realit, duke e larguar rrezikun.
Kur dukej se Roma kishte marrë në dorë frenat e lojës, Reali e gjen rrugën e rrjetës me anë të Cristiano Ronaldo-s në minutën e 57-të. Pas pësimit të golit, skuadra e Spalletti-t nuk ishte më ajo e minutave të para. Reali e dominoi lojën në vazhdim, dhe goli i sigurisë erdhi në minutën e 86-të, i shënuar nga Jese. Lojtari i ndeshjes qe Ronaldo, që pati rol kyç në fitoren 0-2 të Realit.
Në ndeshjen tjetër të mbrëmjes të së mërkurës, Volfsburgu u bëri një surprizë të pakëndshme kampionëve të Belgjikës. Genti u mund 2-3 në fushën e vet, duke lënë pak vend për optimizëm për sfidën e kthimit. Gjermanët kryesuan 0-3 gjer në minutën e 80-të, me rezultatin të ngushtuar më tutje pas dy golave të belgëve. /tesheshi.com/
