Edhe një herë tjetër Reali i bën tifozët e Atletikos të shpërthejnë në lot. Edhe një herë tjetër Reali i mohon Atletikos trofeun e Champions-it.
Pas katër sezonesh janë kthyer 11-metërshat në finalen e Champions League-s. Që i kanë buzëqeshur Realit të Madridit.
90 minutat kanë përfunduar 1-1. Pas një nisjeje të shkëlqyer të finales, Reali e ka parë veten në avantazh në minutën e 15-të, pas golit të Ramos-it. Atletiko ka filluar ta marrë veten pas minutës së 30-të, kur dhe ka nisur të krijojë rastet e para.
Me fillimin e pjesës së dytë, Torres fiton një 11-metërsh, por Griezmann nuk arrin të shënojë, ndërsa topi godet traversën. Goli i barazimit vjen në minutën e 79-të, i realizuar nga Carrasco.
Ramos edhe një herë tjetër tregohet vendimtar, kur në çaste e fundit të lojës së rregullt ndërpret një kundërsulm të Atletikos.
Shtesat nga 15 minuta janë karakterizuar nga lëndime lojtarësh, e nga disa raste të pastra të Realit. Me shifrat e pandryshuara, ka ardhur momenti i 11-metërshave.
Reali ka fituar 5-3. Juanfran gabon në penalltinë e katërt, duke goditur shtyllën. Ronaldo shënon më pas për Realin.
Kaq ka mjaftuar që të shpërthejë festa e Realit.
Reali i Madridit bëhet kampion i Europës për herë të 11-të; Atletiko nuk arrin ta fitojë për herë të parë trofeun e Champions League-s. /tesheshi.com/
