Ish-presidenti amerikan Donald Trump ka nisur një sërë sulmesh ndaj presidentit Joe Biden, duke e dënuar ashpër fjalimin e tij mbi gjendjen e kombit.
Teksa Dhoma e Përfaqësuesve po zbrazej ngadalë, ekipi i Trump-it postoi në Twitter një video të regjistruar paraprakisht të “përgjigjes” së tij ndaj gjendjes së kombit.
Trump-i e akuzoi Biden-in se “na çoi në prag të Luftës së Tretë Botërore”, për shkak të mënyrës së menaxhimit të luftës ruso-ukrainase dhe tha se pasardhësi i tij është “presidenti më i korruptuar në historinë amerikane”.
Në një video të “të zjarrtë” dy-minutëshe rë regjistruar paraprakisht, Trump-i e përshkroi SHBA-në si një vend të rrethuar nga emigrantët në kufirin e tij jugor, të dëmtuar nga korrupsioni politik i administratës Biden dhe të rrënuar nga inflacioni.
Trump-i akuzoi Biden-in dhe “demokratët radikalë” për dështim në fushën e imigracionit dhe krimit, si dhe dënoi mënyrën se si presidenti po e trajton çështjen e transgjinorëve.
“Administrata e tij po bën një luftë kundër fjalës së lirë. Ata po përpiqen të indoktrinojnë dhe të sakatojnë fëmijët tanë. Ai po na çon në prag të Luftës së Tretë Botërore. Dhe mbi të gjitha, ai është presidenti më i korruptuar në historinë amerikane”, tha Trump-i.
Trump-i tha se miliona emigrantë pa dokumente “janë derdhur përtej kufirit tonë jugor” dhe se kartelet e drogës “po bëjnë miliarda dollarë në kontrabandë helmesh për të vrarë njerëzit dhe fëmijët tanë”.
“Vrasësit e egër, përdhunuesit dhe kriminelët e dhunshëm po lirohen nga burgu për të vazhduar aktivitetin e tyre krinimal”, tha Trump-i.
Trump-i po ashtu fajësoi Biden-in për inflacionin e lartë dhe e akuzoi atë për “armatosjen” e Departamentit të Drejtësisë kundër tij. /tesheshi.com/
