Asnjë gjurmë plumbash nuk u gjet në trupin e helikopterit të presidentit të ndjerë iranian Ebrahim Raisi, i cili u rrëzua në fillim të kësaj jave, sipas një deklarate nga Shtabi i Përgjithshëm i Forcave të Armatosura të Iranit.
“Nuk u gjetën gjurmë plumbash apo objektesh të ngjashme në trupin e helikopterit të rrëzuar”, thuhet në një deklaratë të kanalit televiziv IRIB.
Shtabi i Përgjithshëm i Forcave të Armatosura të Iranit tha se po publikon gjetjet paraprake të hetimit për aksidentin fatal që i mori jetën presidentit dhe siç thekson “mund të thuhet me siguri se nuk ka pasur plumba”.
Raporti përsëriti gjithashtu se mbeturinat u gjetën duke përdorur dronët iranianë, duke hedhur poshtë pretendimin e Ankarasë se droni turk Akinci gjeti mbeturinat.
Arkivoli i Raisit u dërgua në Mashhad në Iranin verilindor pasi një procesion funerali u mbajt në nder të tij këtë mëngjes në qytetin lindor të Birzad, ku mijëra njerëz dolën në rrugë për të bërë nderimet e tyre të fundit.
Raisi, 63 vjeç, shihej gjerësisht si një kandidat për të pasuar liderin suprem 85-vjeçar Ali Khamenei.
Tetë pasagjerë dhe anëtarë të ekuipazhit vdiqën kur helikopteri u rrëzua në një zonë malore pranë kufirit me Azerbajxhanin. /tesheshi.com/
