Familja e legjendës së Formula 1, Michael Schumacher ka fituar një gjyq kundër botuesit të një reviste javore gjermane që publikoi një “intervistë” të tij të krijuar nga AI.
Sipas Guardian, në prill 2023 revista Die Aktuelle shfaqte Schumacher në kopertinën me titullin: “Michael Schumacher, intervista e parë”, me fjalët e supozuara që i atribuohen legjendës të Formula 1 të prodhuara nga Inteligjenca Artificiale.
Në një deklaratë të enjten për Associated Press, zëdhënësja e familjes së Schumacher, Sabine Kemm e quajti veprimin ligjor një “të suksesshëm”, pa komente të mëtejshme. Shuma e dëmshpërblimit thuhet të jetë 200 mijë euro.
Pas zhurmës së shkaktuar nga intervista e supozuar, grupi mediatik gjerman Funke i kërkoi falje familjes së Schumacher dhe shkarkoi kryeredaktoren e Die Aktuelle, Anne Hoffmann.
“Ky artikull i poshtër dhe mashtrues nuk duhet të ishte botuar kurrë. Në asnjë mënyrë nuk i përmbush standardet e gazetarisë që ne dhe lexuesit tanë presim nga një grup si Funke”, tha në atë kohë drejtoresha e revistave të grupit, Bianca Polman. /tesheshi.com/
