Kryeministri Rama tha se njohja e Kosovës si shtet sovran i pavarur nga Serbia është kapitulli i fundit në historinë e dhimbshme të shpërbërjes së Jugosllavisë.
Në një intervistë për televizionin spanjoll RTE, ai tha se në “procesin e paqes” pritet që ndonjëherë të ketë tension, siç ishte rasti në kalimet në Jarinje dhe Brnjak.
“Tensionet janë pjesë e atij procesi. Ne nuk mund të presim që procesi i paqes të ecë pa probleme dhe pa tensione. Lajmi i mirë këtu është se tensionet po shfaqen dhe po zhduken, sepse të dyja palët ende po komunikojnë dhe po përpiqen të gjejnë zgjidhjet e nevojshme për njerëzit,” tha Rama.
“Sigurisht që Kosova është problemi i fundit, ende i hapur dhe i pazgjidhur nga shpërbërja e Jugosllavisë, dhe pa dyshim njohja e Kosovës si shtet sovran i pavarur nga Serbia është kapitulli i fundit në historinë e dhimbshme të shpërbërjes së Jugosllavisë “, tha ai.
Spanja dhe çështja e njohjes së Kosovës
Ai vlerësoi se fakti që Spanja nuk e njohu pavarësinë e Kosovës ka të bëjë me problemet e saj të brendshme, dhe jo sepse ajo ka probleme me shqiptarët apo vetë Kosovën.
“Ne e dimë shumë mirë se pozicioni i Spanjës nuk ka të bëjë me asnjë problem që lidhet me shqiptarët ose me vetë Kosovën, por ka të bëjë me historinë dhe problemet e saj të brendshme. Ne duhet të jemi shumë të qartë këtu, sepse nuk ka asnjë krahasim të mundshëm midis problemeve të brendshme të Spanjës, të lidhura me lëvizjet e pavarura ose separatiste, dhe ndarjes së Kosovës nga Serbia,” tha Rama. /tesheshi.com/
