Fjala “kazani” duket se tashmë ka hyrë e ka zënë vend në ligjërimin politik të kryemistrit Rama, në rastet kur ai zgjedh të shpotisë median kritike ndaj tij. E dalë vetëvetiu dhe më pas mbrojtur gjatë përballjes më të fundit në Opinion-in e Blendi Fevziut, “kazani” po promovohet tashmë si një shigjetim ndaj kundërshtarëve, në politikë e media, edhe për faktin se ky send përbënte simbolikën më të fuqishme kundër tij gjatë protestave që kundërshtonin ligjin e importit të mbetjeve.
“Ajo që njerëzit nganjëherë nuk e perceptojnë, për shkak të propagandës së kazanit, është që kjo lloj qasjeje sjell rritje të ekonomisë lokale, sepse sjell rritje të dëshirës për të bërë biznes të vogël. Sjell rritje të dëshirës për të konsumuar, e patjetër edhe rritje të vetëpunësimit, ose të punësimit të vogël”, tha Rama gjatë një vizite më Librazhd, aty ku pa nga afër një rikonstruksion të sheshit qëndror e disa lagjeve, si pjesë e Rilindjes Urbane.
“Unë e kam shumë të qartë që këtu ka ende shumë nevoja, por është e rëndësishme që të gjithë njerëzit duhet të kuptojnë se ky është një proces i pandalshëm dhe shumë i shëndetshëm i zhvillimit urban. Përmirësimi i cilësisë si nata me ditën i hapësirës publike, në qytetin bazë të bashkive të reja, është një mesazh shumë i qartë për çdo banor të bashkive në fshatin më të largët. Nga ana tjetër është e vetmja mundësi për të krijuar komunitet, bashkëjetesë, sens përkatësie dhe për t’u shkëputur psikologjikisht nga ndarja dhe izolimi në shumë copa, me 400 komuna e me 400 mijë plagë, që në vend që të kuroheshin, vetëm sa u agravuan dhe u infektuan”, shtoi më tej shefi i qeverisë. /tesheshi.com/
