Pas gati dy javësh debat mbi dekorimin nga ana e Ministrisë së Mbrojtjes së ish-torturuesit të At Zef Pllumit dhe Sali Repishtit, kryeministri Rama u ka kërkuar ndjesë të dyve, njërit të ikur nga botë tashmë, e tjetrit ende në jetë.
“Eshtë një gabim, por është pa dashje”, ka thënë shefi i qeverisë së Tiranës, duke shpjeguar më pas se pse ka ndodhur ky gabim.
Rama tha se në qindra emra të veteranëve të kategorisë së parë që janë dekoruar në përvjetorin e çlirimit të atdheut, askush nuk është parë emër për emër, e askush nuk ka ditur së për kë bëhej fjalë. Por ai tha se gjithçka është bërë bazuar në një kuadër ligjor të trashëguar që nga viti 1994, kur president ishte Sali Berisha.
Madje Rama tha se ka qenë vetë Berisha ai që i ka dekoruar me të njëjtin ligj, që edhe pse më pas ka qenë në pushtet nuk ka denjuar ta ndryshojnë. Rama tha gjithashtu se e torturuesi i At Zef Pllumit, jo vetëm është dekoruar nga Sali Berisha po me të njëjtin ligj që ka dekoruar MM kategorinë e parë të veteranëve, porse i ka caktuar dhe një pension ekstra këtij personi, që sot, siç tha Rama, “e ka hedhur në oborrin tonë, siç komunistët fusnin pushkët nëpër kisha dikur, për t’i akuzuar të nesërmen priftërinjtë si armëmbajtës”. /tesheshi.com/
