Kryeministri i Shqipërisë është ndalur paraditen e së dielës në qytetin e Shkodrës, ku ka përuruar nisjen e punimeve për ndërtimin e stadiumit të ri të Shkodrës, një stadium ku pritet të zhvillojë ndeshje edhe kombëtarja e Shqipërisë mundësisht duke nisur nga ajo me Serbinë.
Kreu i FSHF, Armand Duka, ka kërkuar falje qytetarëve shkodranë, e veçanërisht tifozëve, që e la Shkodrën të dytën pas Elbasanit, vendim që sipas tij e bëri të pësonte shumë sharje.
“Uroj të më falni, që projekti i parë u bë në Elbasan dhe e lamë për të dytin “Loro Boriçin” e Shkodrës. Nisma ka qenë e kryeministrit të Shqipërisë, Edi Rama. Jemi krenarë dhe mirënjohës, që qeveria i ka hedhur sytë edhe nga sporti dhe po bën investime tepër të mëdha, dhe ashtu siç bëmë “Elbasan Arena”-n, tashmë po nisim punën për stadiumin e Shkodrës”, tha kreu i FSHF-së, Armand Duka.
Menjëherë pas tij e mori fjalën kryeministri Rama, i cili e nisi me një sfidë lëshuar Dukës.
“E dëgjova Dukën lidhur me të sharat që ka ngrënë nga kjo “tribunë VIP”, nëse mund të quhet e tillë, dhe mund të them se jam gati të bëj një garë me të se kush mund të hajë më shumë të shara. Presidenti i ka ngrënë vetëm nga kjo tribunë, ndërsa unë thjesht po mendoj sesa shumë të shara po më bëjnë vlonjatët, që shohin se stadiumi i dytë i Kombëtares në Shqipëri po bëhet në Shkodër”, tha kreu i qeverisë.
“Jam krenar që po bëjmë diçka për djemtë tanë të ekipit kombëtar, për të cilët shumë drejtues politikë të së kaluarës janë kujtuar vetëm kur ka pasur ndonjë rezultat surprizë. Ndërkohë që, qeveria jonë është e vendosur për të bërë maksimumin për sportin, e veçanërisht për futbollin, pasi këtu shfrytëzojmë raportin dhe marrëdhëniet e mira dhe mirëkuptimin që kemi gjetur me drejtuesit e FSHF-së. Vetëm pak kohë më parë rrezikonim të mbeteshim pa stadium dhe Kombëtarja do të luante jashtë vendit. Ne ia dolëm dhe i dhamë Elbasanit një stadium të standardeve europiane e ndërkombëtare, që u lavdërua prej shumë të tjerësh sapo shkelën në të. E di që ka edhe nga ata që thonë se “ne nuk kemi nevojë për stadiume, por për gjëra të tjera”, por kam bindjen se gjithë këto zhvillime janë gjëja e duhur për të ardhmen. Stadiumet janë ekonomi direkte dhe indirekte. Ne jemi të bindur se ky stadium do t’i sjellë Shkodrës shumë më shumë, jo vetëm gjatë ndeshjeve të Kombëtares, por edhe falë vizitorëve që do të vijnë këtu. Mjafton të pyesni sesa fitime ka pasur Elbasani prej një investimi të ngjashëm, prej tifozëve që u dyndën në të dhe turistët gjithashtu. Jam i bindur se stadiumi i Elbasanit, ky stadium këtu në Shkodër, që do të jetë më i bukuri në vend dhe ndoshta edhe në Ballkan, por edhe Parku Olimpik kanë një vlerë shumë herë më të madhe nga sa marrin gjatë investimit. Kemi projekte edhe për 44 terrene të reja sportive nëpër shkolla në të gjithë vendin, për të përmbushur si qeveri angazhimet që kemi marrë. Por mbi të gjitha projekti ynë për sportin do të vijojë, pas Elbasanit dhe Shkodrës, me stadiumin tonë kombëtar në Tiranë. Nuk na mbetet gjë tjetër, veçse të vijojmë punën me hapat më të shpejtë të mundshëm, në mënyrë që punimet të mbarojnë në kohë. Kam besimin se Shkodra e meritonte këtë stadium, për më tepër për shkak të emrit që mban ky impiant. E nëse dikush sot nga Facebook-u mund të pyesë se kush është ky Loro Boriçi, mjafton të themi se nëse futbolli në botë e ka origjinën nga Anglia, këtu në Shqipëri futbolli e ka origjinën nga Shkodra”, deklaroi Rama.
